कोळगावथडीत वन विभागाच्या पथकावर हल्ला; जप्त केलेला वाळूचा ट्रॅक्टर पळवला

कोपरगाव : तालुक्यातील कोळगावथडी येथे गोदावरीच्या पात्रालगत असलेल्या राखीव वनक्षेत्रातून वाळूची चोरटी वाहतूक रोखण्यासाठी गेलेल्या वन विभागाच्या फिरत्या पथकावर ९ ऑक्टोबरला रात्री एकच्या सुमारास हल्ला झाला. पथकाचे शासकीय वाहन हत्यारांनी फोडण्यात आले आणि पथकाने ताब्यात घेतलेला वाळूचा ट्रॅक्टर बळजबरीने नेण्यात आला, असे फिर्यादीत नमूद आहे.

ऑनलाइन आलेल्या लेखी तक्रारीवरून वरिष्ठांनी दिलेल्या आदेशानुसार अहिल्यानगरहून आलेले हे पथक ८ ऑक्टोबरला रात्री साडेअकराच्या सुमारास कोळगावथडीतील वनक्षेत्र गट क्रमांक २४३ मध्ये चौकशीसाठी पोहोचले. नदीपात्रातून राखीव वनात शिरून तेथे वाळूचा साठा केला जात असल्याचे आणि ती चोरून वाहून नेली जात असल्याचे आढळल्याने पथकाने एक ट्रॅक्टर पकडला.

त्यानंतर संशयितांनी अनोळखी साथीदारांसह पथकाची वाट अडवली आणि लोखंडी गज, लाकडी दांडके व कोयत्यांनी कर्मचाऱ्यांवर हल्ला चढवला, असा आरोप आहे. कर्मचाऱ्यांना शिवीगाळ करून ठार मारण्याची धमकीही देण्यात आली. ट्रॅक्टरसोबत त्यात भरलेली एक ब्रास सरकारी वाळूही नेण्यात आली. ट्रॅक्टर पकडल्याचा राग आणि दोन गटांमधील वाद ही हल्ल्यामागची कारणे असल्याचे सांगितले जाते.

अहिल्यानगरचे उपवनसंरक्षक धर्मवीर सालविठ्ठल आणि नाशिकच्या दक्षता पथकाचे विभागीय वन अधिकारी डॉ. अजित साजणे यांच्या आदेशाने पथकातील वनपरिक्षेत्र अधिकाऱ्यांनी पोलिसांत फिर्याद दिली. त्यावरून १४ नामनिर्दिष्ट संशयित आणि ३५ ते ४० अनोळखी व्यक्तींविरुद्ध गुन्हा नोंदवण्यात आला आहे.

जिल्हा पोलीस अधीक्षक मुम्मका सुदर्शन आणि उपविभागीय पोलीस अधिकारी अमोल भारती यांच्या मार्गदर्शनाखाली कोपरगाव तालुका पोलीस ठाण्याचे निरीक्षक संभाजी गायकवाड आणि सहायक निरीक्षक धरमसिंग सुंदरडे तपास करत आहेत.

माहिती स्रोत: सकाळ