दर्यापूरच्या सराफी दुकानावर दरोडा टाकणाऱ्या टोळीविरुद्ध मकोका

दर्यापूर : शहरातील एका सराफी दुकानावर दरोडा टाकणाऱ्या पाच जणांच्या टोळीविरुद्ध महाराष्ट्र संघटित गुन्हेगारी नियंत्रण कायद्यानुसार (मकोका) कारवाई करण्यात आली आहे. दर्यापूर पोलिसांनी पोलीस अधीक्षक निकेतन कदम यांच्याकडे पाठवलेल्या प्रस्तावाला मान्यता मिळाली आहे.

दर्यापूर येथील या दुकानात १ ऑगस्ट रोजी शस्त्रांचा धाक दाखवून सोन्या-चांदीचे मौल्यवान दागिने लुटण्यात आले होते. अकोट, खामगाव आणि सातारा येथील रहिवासी असलेल्या पाच संशयितांचा या टोळीत समावेश आहे. स्थानिक गुन्हे शाखेने समांतर तपास करून त्यांपैकी तिघांना अटक केली होती आणि गुन्ह्यातील ऐवज जप्त केला होता.

दरोड्यानंतर पोलिसांनी टोळीच्या पार्श्वभूमीची तपासणी केली असता तिच्या सदस्यांविरुद्ध विविध जिल्ह्यांत गंभीर गुन्हे दाखल असल्याचे आढळले. काही गुन्हे त्यांनी एकट्याने, तर बहुतांश गुन्हे टोळीतील साथीदारांसोबत केले आहेत. गेल्या दहा वर्षांपासून हिंसा, धमक्या, बळजबरी किंवा बेकायदा मार्गांचा वापर करून संघटित गुन्हेगारी करणे आणि त्यातून वर्चस्व व आर्थिक लाभ मिळवणे, हा टोळीचा उद्देश असल्याचे तपासात दिसून आल्याने मकोकाचा प्रस्ताव पाठवण्यात आला होता.

माहिती स्रोत: हिंदुस्थान समाचार