दुष्काळातही जालन्याच्या स्टील उद्योगाला जायकवाडीचा आधार; रोज सुमारे चार एमएलडी पाणी, उत्पादनावर परिणाम नाही

जालना : जालना शहराच्या औद्योगिक वसाहतीत स्टील कंपन्यांची संख्या मोठी असून त्यांना उत्पादनासाठी मोठ्या प्रमाणात पाणी लागते. या वसाहतीला जायकवाडी धरणातून स्वतंत्र जलवाहिनीद्वारे पाणी मिळते. जिल्ह्यात दुष्काळी स्थिती असली तरी जायकवाडीत पुरेसा पाणीसाठा असल्याने उद्योगांच्या पाणीपुरवठ्यात कपात झालेली नाही, त्यामुळे सध्या स्टील उत्पादनावर परिणाम झालेला नाही.

स्टील आणि बियाणे उद्योगांमुळे जालन्याची देशभर ओळख आहे. तीन टप्प्यांतील औद्योगिक वसाहतीत लहान-मोठ्या मिळून सुमारे ३०० कंपन्या असून त्यांपैकी दहा ते अकरा मोठे स्टील प्रकल्प आहेत. मोठ्या कंपन्यांना रोज दोन ते अडीच एमएलडी, तर इतर लहान कंपन्यांना मिळून दीड ते दोन एमएलडी पाणी लागते.

जायकवाडीहून खोडेगाव, शेंद्रामार्गे औद्योगिक वसाहतीपर्यंत स्वतंत्र जलवाहिनी आहे. वसाहतीत दोन मोठ्या टाक्या आणि दीड व तीन एमएलडी क्षमतेचे दोन संप असून तेथून कंपन्यांना १५ ते ८० मिमीपर्यंतच्या जोडण्या दिल्या आहेत. सध्या सुमारे २५७ नळजोडण्या असून त्यांची महिन्याची पाणीपट्टी ३० ते ३१ लाख रुपयांच्या घरात जाते; ती एमआयडीसीचा पाणीपुरवठा विभाग वसूल करतो.

वसाहतीला रोज सुमारे चार एमएलडी पाणी लागते आणि ते नियमितपणे मिळत आहे; सध्या कोणतीही पाणीकपात नाही, असे एमआयडीसीचे पाणीपुरवठा अभियंता अजय किंगरे यांनी सांगितले. पाणीकपात झाल्यास स्टील उत्पादनावर मर्यादा येऊन कंपन्यांचे नुकसान होते आणि कामगारांच्या रोजगारावरही गदा येते. त्यामुळे उद्योगांचा पाणीपुरवठा कमी होणार नाही याची काळजी एमआयडीसी घेत आहे.

माहिती स्रोत: सकाळ