मत्स्योदरी देवीच्या नवरात्र यात्रेवर ४२ सीसीटीव्हींची नजर; उन्हामुळे दर्शनरांगांत मंडप आणि पाण्याचे फवारे

अंबड : अंबड येथील आदिशक्ती श्री मत्स्योदरी देवीच्या शारदीय नवरात्र महोत्सवाला रविवारी (ता. ११) घटस्थापनेने प्रारंभ होत आहे. यात्रा विजयादशमीपर्यंत, म्हणजे २० ऑक्टोबरपर्यंत चालणार असून १७ ऑक्टोबरला सातव्या माळेचा मुख्य दिवस आहे. त्या दिवशी सायंकाळच्या आरतीनंतर परंपरेनुसार आतषबाजी होईल. २५ ऑक्टोबरला कोजागिरी पौर्णिमेनिमित्त दर्शन यात्रा भरणार आहे.

यात्रेच्या तयारीचा आढावा घेण्यासाठी शनिवारी (ता. १०) मंदिराच्या सभागृहात विविध शासकीय यंत्रणांची बैठक झाली. संस्थानचे अध्यक्ष तथा तहसीलदार सोमेश मोहिते, पोलीस निरीक्षक संतोष घोडके आणि वीज वितरण कंपनीचे शहर अभियंता लक्ष्मण पुंडे यांच्यासह अधिकारी उपस्थित होते. मंदिर परिसरात ४२ सीसीटीव्ही कॅमेऱ्यांद्वारे यात्रेवर नजर ठेवली जाणार आहे.

यंदाची वाढती उष्णता लक्षात घेऊन दर्शनरांगा आणि मंदिराकडे जाणाऱ्या पायऱ्यांवर मंडप उभारण्यात आले असून दुपारी उन्हाचा त्रास कमी करण्यासाठी पाण्याचे बारीक फवारे सोडले जातील. मंदिर परिसरात दोन पोलीस चौक्या, फिरती पथके, साध्या वेशातील आणि महिला पोलीस तैनात असतील. अंबड पोलिसांसोबत जिल्हास्तरावरून अतिरिक्त बंदोबस्त आणि राज्य राखीव पोलीस दलाची तुकडी मागवण्यात आली असून तेरा पोलीस अधिकारी बंदोबस्तात आहेत. अंबडच्या आयटीआयमधील राष्ट्रीय सेवा योजनेचे ७० विद्यार्थी दर्शनरांगांचे व्यवस्थापन सांभाळतील.

मत्स्योदरी देवीचा डोंगर माशाच्या आकाराचा असून गाभारा माशाच्या पोटाच्या भागी असल्यासारखी रचना असल्याने देवीला हे नाव पडल्याची आख्यायिका आहे. नवरात्रात नऊ दिवस मंदिर परिसरात घटी बसून उपवास करण्याची परंपरा असून दरवर्षी सुमारे आठशे ते हजार भाविक येथे मुक्काम करतात. मंदिर परिसरात स्वयंचलित विद्युत रोषणाई करण्यात आली असून सशुल्क वाहनतळ, नगरपरिषदेचे स्वच्छता पथक आणि वीज कंपनीचे पथक तैनात आहे.

माहिती स्रोत: पुढारी; पुढारी