मानसिक समस्या असणाऱ्यांना समजून घ्या; धुळ्यात जनजागृती फेरीत जिल्हा शल्यचिकित्सकांचे आवाहन

धुळे : मानसिक आरोग्याच्या समस्यांशी झुंजणाऱ्या व्यक्तींना आजारापेक्षा समाजातील गैरसमज, भीती आणि नकारात्मक दृष्टिकोनाचा अधिक त्रास होतो. त्यांना दोष न देता त्यांचे म्हणणे शांतपणे ऐकून घेणे आणि समुपदेशन व उपचारांसाठी प्रोत्साहन देणे ही प्रत्येकाची जबाबदारी आहे, असे जिल्हा शल्यचिकित्सक डॉ. रवींद्र सोनवणे यांनी सांगितले.

‘सेवा संकल्प अभियाना’अंतर्गत जागतिक मानसिक आरोग्य दिन आणि पॅलिएटिव्ह केअर दिनानिमित्त शनिवारी (१० ऑक्टोबर) जिल्हा रुग्णालयातर्फे शहरात जनजागृती फेरी काढण्यात आली. जिल्हाधिकारी भाग्यश्री विसपुते यांच्या निर्देशानुसार झालेल्या या फेरीला डॉ. सोनवणे यांनी हिरवा झेंडा दाखवला. जिल्हा रुग्णालयापासून जिल्हा परिषद मार्गे जिल्हाधिकारी कार्यालयापर्यंत ही फेरी निघाली.

मानसिक आजारांची लक्षणे वेळीच ओळखून योग्य उपचार घेतल्यास अनेक समस्यांवर प्रभावी उपचार शक्य आहेत. त्यामुळे संकोच किंवा भीती न बाळगता गरज भासल्यास जिल्हा रुग्णालयातील मानसोपचार विभागातील सेवा आणि समुपदेशनाचा लाभ घ्यावा, असे आवाहन त्यांनी केले.

फेरीत जिल्हा विधी सेवा प्राधिकरण, नर्सिंग महाविद्यालये आणि राष्ट्रीय किशोर स्वास्थ्य कार्यक्रमाचे प्रतिनिधी आणि विद्यार्थी सहभागी झाले. अतिरिक्त जिल्हा शल्यचिकित्सक डॉ. समीर शेख, जिल्हा मानसिक आरोग्य कार्यक्रमाचे डॉ. हरीश मेहरा आणि मनोविकारतज्ज्ञ डॉ. विक्रम वैद्य उपस्थित होते.

माहिती स्रोत: सकाळ