जगातील आघाडीच्या दोन टक्के संशोधकांच्या यादीत शिवाजी विद्यापीठाचे २३ संशोधक

कोल्हापूर : अमेरिकेतील स्टॅनफोर्ड विद्यापीठाने जाहीर केलेल्या जगातील आघाडीच्या दोन टक्के संशोधकांच्या २०२६ च्या यादीत शिवाजी विद्यापीठातील २३ संशोधक आणि प्राध्यापकांचा समावेश झाला आहे. विद्यापीठाचे शिक्षक, माजी शिक्षक आणि माजी विद्यार्थी यांचा त्यात समावेश असून प्र-कुलगुरू डॉ. ज्योती जाधव (जैवरसायनशास्त्र) आणि माजी प्र-कुलगुरू प्रा. प्रमोद पाटील (पदार्थविज्ञान) यांचीही नावे यादीत आहेत.

यादीतील बहुसंख्य संशोधक पदार्थविज्ञानातील असून रसायनशास्त्र, नॅनोतंत्रज्ञान, जैवतंत्रज्ञान, इलेक्ट्रॉनिक मटेरियल्स आणि गणित या विषयांतील संशोधकांचाही समावेश आहे. प्रा. विश्वास बापट (जैवतंत्रज्ञान), डॉ. सागर डेळेकर (रसायनशास्त्र), डॉ. सचिन ओतारी (नॅनोतंत्रज्ञान), प्रा. तुकाराम डोंगळे (इलेक्ट्रॉनिक मटेरियल्स) आणि डॉ. सचिन भालेकर (गणित) ही त्यातील काही नावे आहेत.

संशोधकांच्या वार्षिक आणि संपूर्ण कारकिर्दीतील कामगिरीचा या मानांकनासाठी विचार केला जातो. प्रसिद्ध शोधनिबंधांची संख्या आणि गुणवत्ता, त्यांना मिळालेले संदर्भ (सायटेशन्स) आणि संशोधनातील योगदान अशा निकषांवर हे मानांकन ठरते.

संपूर्ण कारकिर्दीतील कामगिरीच्या यादीत डॉ. ज्योती जाधव, डॉ. प्रमोद पाटील, डॉ. केशव राजपुरे, डॉ. सुशीलकुमार जाधव, डॉ. संजय गोविंदवार, डॉ. चंद्रकांत भोसले, डॉ. विश्वास बापट, डॉ. सी. डी. लोखंडे आणि निवृत्त शिक्षक डॉ. ए. व्यंकटेश्वर राव यांचा समावेश आहे.

माहिती स्रोत: पुढारी