शेटफळ तलावासाठीचे पाणी चोरी होऊ नये म्हणून निरा डाव्या कालव्यावर आठ सुरक्षारक्षक

इंदापूर : निरा डाव्या कालव्यातून शेटफळ तलावासाठी आवर्तन सोडण्यात आले असून हे पाणी पूर्ण दाबाने तलावापर्यंत पोहोचावे आणि वाटेत त्याची चोरी होऊ नये, यासाठी जलसंपदा विभागाने यंदा कडक बंदोबस्त ठेवला आहे. पुणे जिल्हा सुरक्षा रक्षक मंडळाचे आठ जवान कालव्याच्या हेडवर तैनात करण्यात आले आहेत.

हे सर्व रक्षक भोर तालुक्यातील असून ते दिवसरात्र कालव्याकडेने गस्त घालतील आणि प्रत्येक फाट्याच्या हेडवर लक्ष ठेवतील, असे जलसंपदा विभागाचे सहायक अभियंता व्ही. पी. काटे, रोहित झणझणे आणि शाखा अभियंता रतन झगडे यांनी सांगितले.

मागील अनेक आवर्तनांमध्ये रात्रीच्या वेळी फाट्याच्या हेडवरील छोटी दारे (चिमणी) उघडून काही शेतकरी बेकायदा पाणी आपल्या शेतात घेत होते. त्यामुळे तलावापर्यंत पाणी कमी दाबाने पोहोचत होते आणि तलाव पूर्ण भरत नव्हता. ही चोरी रोखण्यासाठी या वेळी संरक्षणात पाणी सोडण्याचा निर्णय घेण्यात आला. फाट्यांवरून पाणी चोरताना कोणी आढळल्यास नियमानुसार कारवाई केली जाईल, असा इशाराही विभागाने दिला आहे.

पावसाने ओढ दिल्याने यंदा दुष्काळाच्या झळा तीव्र आहेत आणि पुढील आठ महिने पिण्याच्या व शेतीच्या पाण्याचे नियोजन याच कालव्याच्या पाण्यावर करावे लागणार आहे. तलाव भरल्यास परिसरातील पाणीटंचाई काही प्रमाणात कमी होईल आणि साठा घटल्याने चिंतेत असलेल्या शेतकऱ्यांना दिलासा मिळेल.

माहिती स्रोत: पुढारी