मुख्य निवडणूक आयुक्तांना हटवण्याच्या मागणीसाठी कळमनुरीत पाच तास धरणे; राष्ट्रपतींना निवेदन

कळमनुरी : मुख्य निवडणूक आयुक्त ज्ञानेश कुमार यांना पदावरून हटवावे आणि त्यांच्यावर कारवाई करावी, अशी मागणी करत भारतीय संविधान-लोकशाही बचाव संघर्ष समितीने शनिवारी (ता. १०) शहरात पाच तास धरणे आंदोलन केले. नव्या बसस्थानक परिसरातील महात्मा ज्योतिबा फुले यांच्या पुतळ्यासमोर हे आंदोलन झाले. अभिजीत दिपके आणि नेहा बोर या विद्यार्थी-युवा नेत्यांच्या नेतृत्वात दिल्लीतील जंतर-मंतरवर झालेल्या आंदोलनाच्या समर्थनार्थ हे धरणे धरण्यात आले.

मतदारयाद्यांच्या विशेष सखोल फेरतपासणीत (एसआयआर) १३ कोटी मतदारांची नावे वगळण्यात आल्याचा आरोप करत आंदोलकांनी मुख्य निवडणूक आयुक्तांना हटवण्याची मागणी केली. आंदोलनाच्या सुरुवातीला डॉ. बाबासाहेब आंबेडकर, महात्मा गांधी, महात्मा ज्योतिबा फुले, सावित्रीबाई फुले आणि भगतसिंग यांच्या प्रतिमांना हार घालण्यात आले.

त्यानंतर तहसीलदार बी. बी. धूत आणि उपविभागीय पोलीस अधिकारी (एसडीपीओ) मयूर रसाळ यांच्याकडे राष्ट्रपती द्रौपदी मुर्मू यांच्या नावे निवेदन सोपवण्यात आले. ॲड. रवि शिंदे (कळमनुरी वकील संघाचे माजी अध्यक्ष), कॉ. चंपतराव नाईक, ॲड. जकी कुरेशी, डॉ. सतीश पाचपुते यांच्यासह तालुक्यातील सामाजिक, राजकीय, शैक्षणिक आणि सांस्कृतिक क्षेत्रांतील अनेक कार्यकर्ते आंदोलनात सहभागी झाले होते.

माहिती स्रोत: देशोन्नती