मानोरा तालुक्यातील ७७ ग्रामपंचायतींच्या सरपंचपदाचे आरक्षण जाहीर; २० पदे सर्वसाधारण महिलांसाठी

मानोरा : राज्य निवडणूक आयोगाच्या निर्देशानुसार तालुक्यातील ७७ ग्रामपंचायतींच्या २०२५-३० या कालावधीसाठीच्या सरपंचपदाचे आरक्षण शुक्रवारी (ता. ९) सोडत पद्धतीने जाहीर करण्यात आले. मानोरा तहसील कार्यालयात उपविभागीय अधिकाऱ्यांच्या अध्यक्षतेखाली आणि तालुका निवडणूक निर्णय अधिकारी तथा तहसीलदार राजेंद्र पाटील यांच्या वतीने ही सोडत काढण्यात आली. नागरिक, विविध पक्षांचे पदाधिकारी, माजी सरपंच आणि इच्छुक उमेदवार मोठ्या संख्येने उपस्थित होते.

आरक्षणानुसार सर्वसाधारण महिलांसाठी २० आणि सर्वसाधारण गटासाठी १९ सरपंचपदे आहेत. नागरिकांचा मागास प्रवर्ग (ओबीसी) महिलांसाठी ९, ओबीसीसाठी ८, अनुसूचित जमातीसाठी ६, अनुसूचित जमाती महिलांसाठी ५, अनुसूचित जातीसाठी ५ आणि अनुसूचित जाती महिलांसाठी ५ पदे राखीव झाली आहेत.

अनुसूचित जमाती महिला प्रवर्गात पोहरादेवी, मेंद्रा, खापरदरी, सोमनाथनगर आणि कुपटा या ग्रामपंचायतींचा समावेश आहे. अनुसूचित जमाती प्रवर्गात गोंडेगाव, माहुली, हातना, सिंगडोह, दापुरा बु. आणि उमरा बु., तर अनुसूचित जाती महिला प्रवर्गात ढोणी, पाळोदी, वाईगौळ, फुलउमरी आणि पारवा यांचा समावेश आहे.

माहिती स्रोत: तरुण भारत