येरमाळ्याच्या येडेश्वरी देवीच्या नवरात्र महोत्सवाची तयारी पूर्ण; रविवारी रात्री घटस्थापना

येरमाळा : तुळजाभवानी देवीची धाकटी बहीण म्हणून परिचित असलेल्या कळंब तालुक्यातील येरमाळा येथील श्री येडेश्वरी देवीच्या शारदीय नवरात्र महोत्सवाची तयारी पूर्ण झाली आहे. अश्विन शुद्ध प्रतिपदेला, म्हणजे रविवारी (ता. ११) रात्री आठ वाजता घटस्थापना, पंचोपचार महापूजा आणि महाआरती होऊन उत्सव सुरू होईल. घटस्थापनेच्या दिवशी नागवेलीच्या पानांची पारंपरिक महापूजा होणार आहे.

तुळजाभवानीच्या दर्शनानंतर अनेक भाविक येडेश्वरी देवीच्या दर्शनाला येतात. नवरात्रात दररोज देवीची वेगवेगळ्या रूपांत पूजा होणार असून परिसरातील विविध गावांच्या भजनी मंडळांचे रात्रजागराचे कार्यक्रम होतील. सोमवारी (ता. १२) एका वेढ्याची, मंगळवारी दोन वेढ्यांची, बुधवारी चंद्राची, तर गुरुवारी (ता. १५) मोराची पूजा होईल.

ललित पंचमीला, म्हणजे गुरुवारी रात्री नऊ वाजता देवीच्या पालखीचा छबिना निघेल. त्यानंतर आकडा, नारळ, साखळी आणि वाघाच्या रूपातील पूजा होणार आहेत. नवमीला उत्तररात्री होमहवन होऊन सूर्योदयापूर्वी पूर्णाहुती दिली जाईल आणि देवीला पुरणपोळीचा नैवेद्य दाखवला जाईल. विजयादशमीला सायंकाळी पाच वाजता पालखीसह सीमोल्लंघन होईल.

कोजागरी पौर्णिमेनिमित्त सोमवारी (ता. २६) बारवाची पूजा आणि रात्री पालखी सोहळा होणार आहे.

माहिती स्रोत: पुढारी