वासोटा किल्ला पर्यटकांसाठी १५ ऑक्टोबरपासून खुला; बोटींत लाइफ जॅकेट, अग्निशमन यंत्रणा बंधनकारक

बामणोली : राज्यासह देशभरातील ट्रेकर्स आणि पर्यटकांचे आकर्षण असलेल्या व्याघ्रगड वासोटा किल्ल्याचे पर्यटन १५ ऑक्टोबरपासून पुन्हा सुरू होणार आहे. सह्याद्री व्याघ्र प्रकल्पाच्या अधिकाऱ्यांनी हा निर्णय घेतला असून पर्यटकांनी नियमांचे काटेकोर पालन करावे, असे आवाहन करण्यात आले आहे.

बामणोली वनपरिक्षेत्र कार्यालयाच्या सभागृहात सह्याद्री व्याघ्र प्रकल्पाचे उपसंचालक किरण जगताप यांच्या अध्यक्षतेखाली बोट क्लब चालक, हॉटेल व टेंट व्यावसायिक आणि स्थानिक ग्रामस्थांची बैठक झाली. व्याघ्र प्रकल्प आणि केंद्र सरकारने घालून दिलेल्या नियमांचे तंतोतंत पालन करण्याच्या सूचना त्यांनी या वेळी दिल्या.

प्रत्येक बोटीत १२ ते १५ प्रवासी असणे बंधनकारक राहील. प्रत्येक बोटीत अग्निशमन यंत्रणा कार्यरत असावी आणि प्रत्येक पर्यटकाला लाइफ जॅकेट देणे बंधनकारक आहे. पर्यटकांनी प्लास्टिकच्या बाटल्या किंवा इतर कचरा पाण्यात फेकू नये, यासाठी बोट चालकांनी त्यांचे प्रबोधन करावे, असे जगताप म्हणाले. कोयना जलाशयाचे प्रदूषण रोखणे हा त्यामागचा उद्देश आहे.

पर्यटकांना चांगल्या सुविधा देण्यासाठी व्याघ्र प्रकल्पाचे अधिकारी प्रयत्नशील असून बोट क्लब चालक, व्यावसायिक आणि ग्रामस्थांनी प्रशासनाला सहकार्य करावे, असे आवाहनही त्यांनी केले. बैठकीला सहायक वनसंरक्षक (वन्यजीव) बाबा हाके, वनपरिक्षेत्र अधिकारी विजय बाठे यांच्यासह बोट क्लबचे पदाधिकारी उपस्थित होते.

माहिती स्रोत: पुढारी