‘आई राजा उदो उदो’च्या जयघोषात तुळजापुरात घटस्थापना; तुळजाभवानीच्या नवरात्र महोत्सवाला प्रारंभ

तुळजापूर : ‘आई राजा उदो उदो’चा जयघोष, संबळाचा गजर आणि पारंपरिक वाद्यांच्या साथीत श्री तुळजाभवानी देवीच्या मंदिरातील सिंहगाभाऱ्यात रविवारी (ता. ११) दुपारी बारा वाजता पारंपरिक पद्धतीने घटस्थापना झाली. यासह नऊ दिवसांच्या शारदीय नवरात्र महोत्सवाला सुरुवात झाली. जिल्हाधिकारी आणि मंदिर संस्थानचे अध्यक्ष कीर्ती किरण पुजार यांनी पत्नीसह घटस्थापनेचे यजमानपद स्वीकारले.

घटासाठी लागणारी सप्तधान्ये, म्हणजे गहू, ज्वारी, मका, मूग, जवस, करडई आणि सातू, परंपरेनुसार तुळजापुरातील शेटे कुटुंबीय पुरवतात. नागवेलीच्या पानांची पहिली माळ घटावर वाहण्यात आली. आमदार आणि मंदिर संस्थानचे विश्वस्त राणाजगजितसिंह पाटील, जिल्हा परिषद अध्यक्ष अर्चना पाटील, नगराध्यक्ष विनोद गंगणे, तहसीलदार माया माने, महंत आणि पुजारी मंडळांचे पदाधिकारी या वेळी उपस्थित होते. गेल्या २४ तासांत अनेक भवानी ज्योत यात्रा येथून मार्गस्थ झाल्या असून कोणताही अनुचित प्रकार घडला नसल्याचे सांगण्यात आले.

उत्सवापूर्वीच कर्नाटक, आंध्र प्रदेश आणि तेलंगणातून भाविक मोठ्या संख्येने येत असून शनिवारी (ता. १०) सुमारे दीड लाख भाविकांनी देवीचे दर्शन घेतले. यात्रेच्या सुरक्षेसाठी तीन उपविभागीय पोलीस अधिकारी, २४ पोलीस निरीक्षक, ७४ उपनिरीक्षक, ११०० पोलीस कर्मचारी आणि ९९० होमगार्ड तैनात आहेत. धाराशिव, सोलापूर, लातूर आणि नळदुर्ग मार्गांवर वाहनांसाठी स्वतंत्र तळ करण्यात आले आहेत.

भाविकांना घाटशीळ रोड-बिडकर तलाव मार्गाने मंदिरात प्रवेश दिला जात असून जिजाऊ महाद्वार आणि आदिबाई आदिशक्ती मंदिर परिसरातून बाहेर पडण्याची व्यवस्था आहे. नगरपरिषदेने ठिकठिकाणी मोफत पिण्याच्या पाण्याच्या पाणपोई उभारल्या असून स्वच्छता आणि अतिक्रमण रोखण्यासाठी स्वतंत्र पथके नेमली आहेत. नवरात्रोत्सवानंतर कोजागिरी पौर्णिमेपर्यंत यात्रा चालणार आहे.

माहिती स्रोत: पुढारी; पुढारी