२४ वर्षांपूर्वी हरवलेल्या बहिणीची भावंडांशी पुन्हा भेट; ठाणे पोलिसांनी सहा तासांत शोधले कुटुंब

ठाणे : तब्बल २४ वर्षांपूर्वी कुटुंबापासून हरवलेल्या एका महिलेचा तिच्या भावंडांशी ठाणे शहर पोलिसांनी पुन्हा संपर्क घडवून आणला. पोलिसांच्या बाल संरक्षण कक्षाने अवघ्या सहा तासांत तिच्या कुटुंबाचा शोध घेऊन व्हिडिओ कॉलद्वारे भावंडांशी बोलणे करून दिले.

भारती अश्रू कदम या २००२ मध्ये लहान असताना नवी मुंबईत मामाकडे गेल्या असताना हरवल्या होत्या. बेलापूर पोलिसांना त्या सापडल्या, मात्र कुटुंबाचा शोध न लागल्याने त्यांना बालगृहात ठेवण्यात आले. पुढे विवाहानंतर त्यांचे नाव जान्हवी झांबरे झाले. सध्या त्या सोलापूरमध्ये राहतात. गेली आठ वर्षे त्या कुटुंबाचा शोध घेत होत्या, तर त्यांचे भाऊ विजय कदम हेही बहिणीचा शोध घेत होते.

८ ऑक्टोबरला भारती यांनी ठाणे शहर पोलिसांच्या बाल संरक्षण कक्षाशी संपर्क साधला. पोलिसांनी जुनी अभिलेखे तपासली, नवी मुंबई पोलीस आणि बेलापूर येथील मिसिंग सेलकडील नोंदी पाहिल्या. जिल्हानिहाय मतदार याद्या तपासताना २००२ च्या मतदार यादीत त्यांच्या भावाच्या नावाची नोंद सापडली. त्यानंतर मतदान केंद्रस्तरीय अधिकाऱ्यांच्या मदतीने कुटुंबाचा पत्ता शोधण्यात आला. भारती यांच्या हातावर गोंदवलेले त्यांचे पूर्ण नावही ओळख पटवण्यासाठी उपयोगी ठरले.

पोलिसांनी त्यांचे भाऊ प्रकाश व विजय आणि बहीण शालिनी यांच्याशी संपर्क साधला. लवकरच भावंडांची प्रत्यक्ष भेट होणार आहे. पोलीस आयुक्त आशुतोष डुंबरे यांच्या मार्गदर्शनाखाली बाल संरक्षण कक्षातील पथकाने हा शोध घेतला.

माहिती स्रोत: लोकसत्ता