विस्थापित स्टॉलधारकांसाठी सावंतवाडीत ‘खाऊ गल्ली’चा विचार; पर्यटन सभापतींचे आश्वासन

सावंतवाडी : नगरपालिकेने केलेल्या कारवाईत जागा गमावलेल्या अधिकृत स्टॉलधारकांनी पर्यटन सभापती मोहिनी मडगावकर यांच्याकडे धाव घेऊन आपली व्यथा मांडली. स्टॉलवरच कुटुंबाचा उदरनिर्वाह अवलंबून असल्याने पर्यायी व्यवस्था करून द्यावी, अशी त्यांची मागणी आहे.

शहरात इतरही अनेक दुकाने असताना कारवाई फक्त आपल्यावरच का, असा प्रश्न स्टॉलधारकांनी उपस्थित केला. हा रोजीरोटीचा प्रश्न असल्याने न्याय मिळावा, अशी विनंतीही त्यांनी केली.

कोणावरही अन्याय होऊ दिला जाणार नाही, असे आश्वासन देत मडगावकर यांनी तोडग्यासाठी लवकरच नगराध्यक्ष, उपनगराध्यक्ष, सभापती आणि सर्व नगरसेवकांची बैठक बोलावली जाईल, असे सांगितले. शहरातील फिरते स्टॉलधारक आणि सायंकाळी व्यवसाय करणाऱ्यांसाठी स्वतंत्र ‘खाऊ गल्ली’ उभारून पर्यायी जागा देण्याचा विचार असून हा विषय कौन्सिलच्या बैठकीत आधीच मांडण्यात आला आहे, असेही त्यांनी स्पष्ट केले.

ज्यांचे स्टॉल नगरपालिकेच्या ताब्यात आहेत, त्यांनी ते परत मिळवण्यासाठी पालिकेकडे रीतसर अर्ज करावा, असे आवाहन मडगावकर यांनी केले. स्टॉलधारकांचे नुकसान होणार नाही अशा पद्धतीने लवकरात लवकर मार्ग काढला जाईल, असे त्यांनी सांगितले.

माहिती स्रोत: तरुण भारत