सप्तशृंगगडावर नवरात्रोत्सवाला प्रारंभ; भाविकांसाठी ४२ वैद्यकीय अधिकारी, ८० आरोग्य कर्मचारी तैनात

नाशिक : लाखो भाविकांचे श्रद्धास्थान असलेल्या श्री क्षेत्र सप्तशृंगगडावर रविवारी (११ ऑक्टोबर) शारदीय नवरात्रोत्सवाला सुरुवात झाली. सकाळी सात वाजता श्री भगवतीची पंचामृत महापूजा आणि साडेनऊ वाजता घटस्थापना झाली. उत्सवकाळात रोज सकाळी सात वाजता पंचामृत महापूजा होईल. राज्याच्या विविध भागांतून आणि देशभरातून भाविक गडावर येऊ लागले आहेत.

यात्रेदरम्यान भाविकांना तातडीने वैद्यकीय सेवा मिळावी, म्हणून नाशिक जिल्हा परिषदेच्या आरोग्य विभागाने गडावर ८० आरोग्य कर्मचारी आणि ४२ वैद्यकीय अधिकारी तैनात केले असून सहा रुग्णवाहिका आणि सहा फिरती आरोग्य पथकेही सज्ज ठेवली आहेत. मुख्य कार्यकारी अधिकारी ओमकार पवार यांच्या सूचनेनुसार आणि जिल्हा आरोग्य अधिकारी डॉ. राजेंद्र बागुल यांच्या मार्गदर्शनाखाली हे नियोजन करण्यात आले.

गडावरील ओपीडी, ट्रस्टचा दवाखाना, श्रीराम मंदिर परिसर, छत्री पॉइंट, जलशुद्धीकरण केंद्र, आरोग्य उपकेंद्र आणि फ्युनिक्युलर ट्रॉली परिसरात आरोग्य सुविधा उपलब्ध असतील. चक्कर, अशक्तपणा, निर्जलीकरण, उलटी-जुलाब, ताप आणि किरकोळ दुखापतींवर तातडीने उपचारांची सोय करण्यात आली आहे.

पिण्याच्या पाण्याची गुणवत्ता, स्वच्छता आणि साथरोग प्रतिबंधावरही विशेष भर देण्यात आला आहे. तालुका आरोग्य अधिकारी डॉ. अभय बंगाळ यांच्याकडे यात्राप्रमुख म्हणून जबाबदारी सोपवण्यात आली आहे.

माहिती स्रोत: पुढारी; पुढारी