शीळ धरणातील साठा जपण्यासाठी रत्नागिरीत सोमवारी पाणी बंद; रोजच्या पुरवठ्यातही १५ मिनिटांची कपात

रत्नागिरी : दुष्काळाच्या संकटामुळे रत्नागिरी नगर परिषदेने शहरात १२ ऑक्टोबरपासून पाणीकपात लागू करण्याचा निर्णय घेतला आहे. यापुढे दर सोमवारी शहराचा पाणीपुरवठा पूर्णपणे बंद राहील, तर इतर दिवशी नेहमीच्या पुरवठ्याच्या वेळेत १५ मिनिटांची कपात होईल. पाणी सभापती निमेश नायर यांनी शुक्रवारी पत्रकार परिषदेत ही माहिती दिली.

एल निनोमुळे दुष्काळाचे सावट असताना पुढील वर्षी एप्रिल-मेपर्यंत शहराला पाणी पुरावे, यासाठी हा निर्णय घ्यावा लागल्याचे नगराध्यक्षा शिल्पा सुर्वे यांनी सांगितले. शहराला पाणी पुरवणाऱ्या शीळ धरणात सध्या ३.३२७ दशलक्ष घनमीटर साठा असून बाष्पीभवनामुळे तो घटत चालला आहे.

पर्यायी व्यवस्था म्हणून नगर परिषद नाचणे येथील तलाव आणि निवखोल येथील विहिरी ताब्यात घेणार आहे. शीळ येथे पूर्वीच्या जॅकवेलच्या जागी असलेल्या विहिरीतूनही पाणी घेतले जाईल, असे नायर यांनी सांगितले.

वाहने धुण्याचे रॅम्प आणि जलतरण तलावांना नोटिसा देऊन त्यांचा पाणीपुरवठा बंद केला जाणार आहे.

माहिती स्रोत: सामना