रायगडमधील ३.८२ लाख मतदारांना पुन्हा पडताळणीच्या नोटिसा; पनवेलमध्ये सर्वाधिक दीड लाख

अलिबाग : मतदार याद्यांच्या विशेष सखोल पुनरीक्षणानंतर (एसआयआर) रायगड जिल्ह्यातील ३ लाख ८२ हजार ८३१ मतदारांना निवडणूक विभागाने पुन्हा पडताळणीसाठी नोटिसा बजावल्या आहेत. प्रारूप मतदार यादीत नावे असलेल्यांचाही यात समावेश असून, पुरावे आणि कागदपत्रे जमवताना मतदारांची तारांबळ उडत आहे.

मतदारसंघनिहाय पाहता सर्वाधिक १ लाख ५० हजार ४२४ नोटिसा पनवेलमध्ये आहेत. त्याखालोखाल उरणमध्ये ५८ हजार ६९८, अलिबागमध्ये ४२ हजार ७४१, महाडमध्ये ४२ हजार ४३३, कर्जत-खालापूरमध्ये ३३ हजार २९४, पेणमध्ये ३० हजार ३८१ आणि श्रीवर्धनमध्ये २४ हजार ८६० मतदारांना नोटिसा मिळाल्या आहेत.

वडील आणि मुलांच्या वयातील अंतर योग्य न वाटणे, २००२ च्या मतदार यादीशी जोडणी नीट न होणे किंवा ती चुकीची असण्याची शक्यता, तसेच विवाहित महिलांच्या नावातील बदल अशी कारणे नोटिसांत देण्यात आली आहेत. आवश्यक पुरावे घेऊन ठरावीक दिवशी आणि वेळी सहायक निवडणूक अधिकाऱ्यांसमोर हजर राहण्यास मतदारांना सांगण्यात आले आहे.

एसआयआरपूर्वी जिल्ह्यात २५ लाख ३३ हजार ७३९ मतदार होते. प्रक्रियेत ५ लाख ८४ हजार ११८ नावे वगळल्यानंतर १९ लाख ४९ हजार ३४१ मतदार उरले. त्यापैकी पावणेचार लाखांहून अधिक जणांना पुन्हा नोटिसा आल्याने मतदारांमध्ये नाराजीचा सूर आहे.

माहिती स्रोत: लोकसत्ता