निलेगावात पाझर तलावात बुडून दोन सख्ख्या भावांचा मृत्यू; जनावरांना पाणी पाजायला गेले होते

अणदूर : जनावरांना पाणी पाजायला पाझर तलावावर गेलेल्या दोन सख्ख्या भावांचा तुळजापूर तालुक्यातील निलेगाव शिवारात बुडून मृत्यू झाला. शनिवारी (ता. १०) सकाळी ही घटना घडली. मृत भावांपैकी एक १२ वर्षांचा, तर दुसरा ११ वर्षांचा होता. ते अनुक्रमे सहावी आणि पाचवीत शिकत होते.

बराच वेळ होऊनही मुले घरी न परतल्याने वडिलांनी तलावाकडे जाऊन शोध घेतला. तलावाच्या काठावर मुलांचे कपडे आणि चपला दिसल्याने त्यांना अनर्थाची शंका आली. त्यानंतर तलावात शोध घेऊन दोघांना बाहेर काढण्यात आले आणि तातडीने रुग्णालयात नेण्यात आले; मात्र डॉक्टरांनी तपासून त्यांना मृत घोषित केले.

एकाच कुटुंबातील दोन मुलांच्या अशा दुर्दैवी मृत्यूमुळे निलेगावसह परिसरात शोककळा पसरली आहे. मुलांच्या पश्चात आई-वडील आणि एक बहीण असा परिवार आहे. ऐन खेळण्याच्या वयात दोघा भावंडांवर काळाने घाला घातल्याने ग्रामस्थ हळहळ व्यक्त करत आहेत.

माहिती स्रोत: पुढारी