नवरात्रोत्सवासाठी नाशिकमध्ये कालिकादेवी मंदिर परिसरात २० ऑक्टोबरपर्यंत वाहतूक बदल

नाशिक : नवरात्रोत्सवानिमित्त मुंबई नाका परिसरातील कालिकादेवी मंदिर आणि भगूर येथील रेणुकादेवी मंदिरांत यंदाही यात्रा भरणार आहे. भाविकांच्या गर्दीमुळे वाहतूक कोंडी होऊ नये, म्हणून पोलिसांनी वाहतूक मार्गांत बदल जाहीर केले असून ते २० ऑक्टोबरपर्यंत लागू राहतील.

कालिकादेवी मंदिर परिसरातील काही मार्ग दिवसभर बंद राहतील, तर भगूर येथे दुपारी दोन ते रात्री बारा या वेळेत निर्बंध असतील. गडकरी सिग्नल ते हॉटेल रुची हा मार्ग दोन्ही बाजूंनी सर्व वाहनांसाठी बंद असेल. चांडक सर्कल ते हॉटेल संदीप या मार्गावर दुचाकी वगळता इतर वाहनांना प्रवेश नसेल.

मुंबई नाका सर्कलवरून हॉटेल रुची, एसएसके हॉटेल आणि चांडक सर्कलमार्गे वाहतूक वळवली जाईल. नाशिकरोड आणि इंदिरानगरकडे जाणाऱ्यांनी मायको सर्कल, आर. डी. सर्कल आणि इंदिरानगर बोगदा या मार्गाचा वापर करावा, असे पोलिसांनी सांगितले.

यात्रेला येणाऱ्या भाविकांच्या वाहनांसाठी स्वतंत्र वाहनतळ ठेवले आहेत. दुचाकींसाठी महामार्ग बसस्थानकाजवळील मैदान, एन. डी. पटेल रोड, गुरुद्वारा रोड आणि गोल्फ क्लब मैदानालगतची जागा अशा ठिकाणी सोय करण्यात आली आहे.

माहिती स्रोत: पुढारी