नवरात्रोत्सवापूर्वी अमरावती महापालिकेने अंबादेवी पुलावर बसवली लोखंडी जाळी

अमरावती : श्री अंबादेवीच्या नवरात्रोत्सवाच्या पार्श्वभूमीवर अमरावती महानगरपालिकेने शहरातील महत्त्वाच्या आणि ऐतिहासिक अंबादेवी पुलावर लोखंडी जाळी बसवली आहे. भाविकांची सुरक्षा आणि पुलावरून नाल्यात कचरा टाकण्याला आळा, हे दोन उद्देश डोळ्यांसमोर ठेवून महापालिका प्रशासनाने हे काम तातडीने करून घेतले.

नवरात्रात श्री अंबादेवी आणि श्री एकवीरा देवीच्या दर्शनासाठी दरवर्षी लाखो भाविक अमरावतीत येतात. या काळात अंबादेवी पुलावर मोठी गर्दी आणि वाहतूक असते. गर्दीत भाविकांना होऊ शकणारे संभाव्य धोके लक्षात घेऊन खबरदारीचा उपाय म्हणून ही जाळी उभारण्यात आली आहे.

पुलावरून नाल्यात कचरा फेकला जात असल्याने अस्वच्छता वाढत होती; जाळीमुळे त्यालाही अटकाव होणार आहे. महापालिकेच्या या कामाचे शहरातील नागरिक आणि भाविकांनी स्वागत केले आहे.

माहिती स्रोत: हिंदुस्थान समाचार