नवरात्रामुळे उपवासाच्या भाज्यांना मागणी; भेंडी, रताळी ८० रुपये किलो, लसूण ४०० रुपयांपर्यंत

छत्रपती संभाजीनगर : नवरात्रोत्सव सुरू झाल्याने उपवासाच्या फराळासाठी लागणाऱ्या भाज्यांना शहरात मागणी वाढली आहे. रताळी, भेंडी, सिंगाडा, कच्ची केळी, लाल भोपळा (डांगर), चक्री आणि भुईमुगाच्या शेंगांना ग्राहकांची पसंती असून त्यांचे भाव तुलनेने आवाक्यात आहेत. औरंगपुरा, शहागंज, टीव्ही सेंटर, मुकुंदवाडीसह शहरातील किरकोळ बाजार या भाज्यांनी फुलले आहेत.

रविवारी (ता. ११) किरकोळ बाजारात रताळी आणि भेंडी प्रत्येकी ८० रुपये किलो होती. चक्रीचा भावही किलोला ८० रुपये होता, तर भुईमुगाच्या शेंगा ५० ते ६० रुपयांना आणि कच्ची केळी डझनाला ६० रुपयांना मिळत होती. सिंगाड्यासाठी किलोमागे सुमारे २०० रुपये मोजावे लागत होते. आवक चांगली असली तरी मागणीच्या तुलनेत ती थोडी कमी पडत असल्याचे औरंगपुऱ्यातील भाजीविक्रेते संजय वाघमारे यांनी सांगितले.

रोजच्या वापरातील काही भाज्यांची आवक घटल्याने त्या महागल्या आहेत. किलोला ३० ते ४० रुपयांना मिळणारा टोमॅटो आता ५० रुपयांवर, तर ४० रुपयांची वांगी ६० रुपयांवर गेली आहेत. गाजर, कारले, हिरवी मिरची आणि सिमला मिरचीचा भाव ६० वरून ८० रुपये झाला आहे. शेवगा १०० रुपये, तर कंटुले २०० ते २४० रुपये किलो आहेत. लिंबू आणि अद्रकसाठी किलोमागे १५० ते २४० रुपये, तर लसणासाठी २५० ते ४०० रुपये मोजावे लागत आहेत.

पालेभाज्या मात्र मुबलक आल्याने स्वस्त आहेत. मेथीची जुडी २० रुपयांना, तर पालक, शेपू, चुका आणि कोथिंबिरीची जुडी प्रत्येकी १५ रुपयांना मिळत आहे. कांद्याचा भाव किलोला ६० ते ७० रुपये, बटाट्याचा २५ ते ३० रुपये आणि भोपळ्याचा ४० रुपये आहे. उपवासाच्या भाज्यांची मागणी वाढल्याने नवरात्रात ग्राहकांच्या खिशावरचा भार मात्र वाढला आहे.

माहिती स्रोत: सकाळ