मोर्शीजवळ मायवाडी फाट्यावर अज्ञात ट्रकची दुचाकीला धडक; महिला व पुरुषाचा जागीच मृत्यू

मोर्शी : शहरालगतच्या मायवाडी फाट्याजवळ शुक्रवारी (ता. ९) रात्री साडेआठच्या सुमारास भीषण अपघात झाला. मागून आलेल्या एका अज्ञात आयशर ट्रकने मोटारसायकलला जोरदार धडक दिल्याने दुचाकीवरील महिला आणि पुरुष दोघांचाही जागीच मृत्यू झाला.

पोलीस सूत्रांच्या माहितीनुसार, दोघे दुचाकीवरून आपल्या गावाकडे जात होते. धडक इतकी जोरदार होती की दोघे रस्त्यावर कोसळले आणि गंभीर जखमांमुळे त्यांचा जागीच मृत्यू झाला. माहिती मिळताच मोर्शी पोलीस ठाण्याचे ठाणेदार राहुल आठवले यांच्या मार्गदर्शनाखाली पथक घटनास्थळी पोहोचले आणि दोन्ही मृतदेह शवविच्छेदनासाठी मोर्शीच्या उपजिल्हा रुग्णालयात पाठवण्यात आले.

मृतांजवळ सापडलेल्या मोबाईलमधील क्रमांकावर संपर्क साधण्याचा प्रयत्न केला असता तो दुसऱ्या राज्यातील असल्याचे आढळले. त्यामुळे दोघांची ओळख अजून पटू शकलेली नाही. मोर्शी पोलीस पुढील तपास करत असून धडक देऊन पसार झालेल्या वाहनाचा शोध घेतला जात आहे.

माहिती स्रोत: पुढारी