मालेगाव तालुक्यात नवदुर्गा उत्सवाला सुरुवात; तीन पोलीस ठाण्यांच्या हद्दीत १२१ मंडळांकडून देवीची स्थापना

मालेगाव : तालुक्यात नवदुर्गा उत्सवाला रविवारी (ता. ११) उत्साहात सुरुवात झाली. मालेगाव, जऊळका रेल्वे आणि शिरपूर या तीन पोलीस ठाण्यांच्या हद्दीत एकूण १२१ नवदुर्गा उत्सव मंडळांनी देवीच्या मूर्तींची स्थापना केली असून शहरांसह ग्रामीण भागातही भक्तिमय वातावरण आहे.

मालेगाव पोलीस ठाण्याच्या हद्दीत शहरातील २२ आणि ग्रामीण भागातील ३५ अशी एकूण ५७ मंडळे उत्सव साजरा करत आहेत. जऊळका रेल्वे ठाण्याच्या हद्दीत जऊळका रेल्वे गावात तीन, राजा किन्ही येथे तीन आणि इतर गावांत २० अशी २६ मंडळे आहेत. शिरपूर ठाण्याच्या हद्दीत शिरपूर शहरातील १४ आणि ग्रामीण भागातील २४ अशी ३८ मंडळे असून तेथील १८ गावांत ‘एक गाव, एक नवदुर्गा उत्सव मंडळ’ या उपक्रमानुसार उत्सव होत आहे.

उत्सवाच्या तयारीसाठी गेल्या काही दिवसांपासून मंडळांनी मंडप उभारणी, आकर्षक रोषणाई आणि मूर्ती आगमनाची तयारी केली होती. मंदिरांची स्वच्छता आणि रंगरंगोटीही पूर्ण झाली होती. महिला आणि तरुणांमध्ये उत्सवाबाबत मोठी उत्सुकता दिसत आहे.

माहिती स्रोत: तरुण भारत; तरुण भारत