कोथळीत वारणा नदीचे पात्र कोरडे; शिरोळ-हातकणंगलेतील अनेक गावांचा पाणीपुरवठा ठप्प

जयसिंगपूर : शिरोळ तालुक्यातील कोथळी येथे वारणा नदीचे पात्र गेल्या चार दिवसांपासून कोरडे पडल्याने गंभीर जलसंकट निर्माण झाले आहे. कोथळी बंधाऱ्यावरून चालणाऱ्या अनेक गावांच्या नळ पाणीपुरवठा योजना पूर्णपणे बंद पडल्या असून ग्रामस्थांना पिण्याच्या पाण्यासाठी वणवण करावी लागत आहे.

कोथळी, उमळवाड, जैनापूर, निमशिरगाव, चिपरी, यड्राव आणि तारदाळ या गावांसह तारदाळ औद्योगिक वसाहतीचा पाणीपुरवठा या बंधाऱ्यावर अवलंबून आहे. पात्र कोरडे पडल्याने योजनांच्या विहिरी आणि जॅकवेल कोरड्या पडल्या असून उपसा थांबला आहे. शेतीचे विजेचे पंपही बंद पडल्याने कडक उन्हात पिके वाळण्याची भीती शेतकऱ्यांना आहे.

या परिस्थितीमुळे शिरोळ आणि हातकणंगले तालुक्यांतील नागरिक आणि शेतकऱ्यांनी वारणा नदीवरील चांदोली धरणातून तातडीने पाणी सोडण्याची मागणी केली होती.

चांदोली धरणातून १,१०० क्युसेक वेगाने विसर्ग सुरू करण्यात आला असून हे पाणी वारणेवरील शेवटचा बंधारा असलेल्या कोथळीत पुढील दोन दिवसांत पोहोचेल, त्यानंतर पाणीपुरवठा पूर्ववत होईल, असे पाटबंधारे विभागाचे शाखा अभियंता व्ही. जी. कोळेकर यांनी सांगितले.

माहिती स्रोत: पुढारी