तुळजापूरहून ज्योत आणणाऱ्या भाविकांना ट्रकची धडक; धुळे-सोलापूर महामार्गावर तिघांचा मृत्यू

करमाड : नवरात्रोत्सवानिमित्त तुळजापूरहून पायी मशाल ज्योत घेऊन खुलताबाद तालुक्यातील गोळेगाव-गदाना येथे परतणाऱ्या भाविकांना धुळे-सोलापूर राष्ट्रीय महामार्गावर कचनेर फाट्याजवळ भरधाव आयशर ट्रकने मागून धडक दिली. शनिवारी (ता. १०) रात्री साडेसातच्या सुमारास झालेल्या या अपघातात तीन तरुणांचा मृत्यू झाला, तर ज्योत घेऊन चालणारा २० वर्षीय तरुण गंभीर जखमी झाला.

ज्योत घेऊन पायी जाणाऱ्या भाविकांच्या सुरक्षेसाठी काही जण दुचाकीवरून त्यांच्या मागे चालले होते. पाठीमागून आलेल्या ट्रकने दुचाकीला जोराची धडक दिली. धडक इतकी जोरात होती की दुचाकीवरील भाविकांसह पायी चालणारे भाविकही त्यात सापडले. ट्रकमध्ये अडकलेली दुचाकी सुमारे दोन किलोमीटर फरफटत गेल्याचेही सांगण्यात येते. अपघातानंतर ट्रकचालक वाहनासह पळून गेला.

मृत तिघे खुलताबाद तालुक्यातील जाकरवाडी आणि गदाना येथील रहिवासी असून जखमी तरुण चिमणापूरवाडीचा आहे. गाव अवघे ४० ते ५० किलोमीटर अंतरावर राहिलेले असतानाच ही दुर्घटना घडल्याने गावांवर शोककळा पसरली आहे.

माहिती मिळताच करमाड पोलीस ठाण्याचे सहायक पोलीस निरीक्षक गोकुळ ठाकूर आणि सहकाऱ्यांनी घटनास्थळी धाव घेतली. जखमींना छत्रपती संभाजीनगर आणि चिकलठाणा येथील रुग्णालयांत नेण्यात आले, तेथे डॉक्टरांनी तिघांना मृत घोषित केले. पोलिसांनी महामार्गावरील वाहतूक सुरळीत केली. करमाड पोलिसांनी गुन्हा दाखल केला असून पोलीस निरीक्षक सम्राटसिंग राजपूत यांच्या मार्गदर्शनाखाली फरार ट्रकचालकाचा शोध घेतला जात आहे.

माहिती स्रोत: सकाळ; साम टीव्ही