कारंजाच्या श्री कामाक्षा देवी मंदिरात शारदीय नवरात्रोत्सवाला प्रारंभ

कारंजा : कारंजा नगरीचे आराध्य दैवत आणि कारंजेकरांची कुलस्वामिनी असलेल्या श्री कामाक्षा देवीच्या शारदीय नवरात्रोत्सवाला रविवारी (ता. ११) प्रारंभ झाला. दरवर्षीप्रमाणे यंदाही उत्सवात पारंपरिक धार्मिक कार्यक्रमांचे आयोजन करण्यात आले आहे. मंदिराचा कारभार महाजन कुटुंबीयांकडे आहे. उत्सवासाठी राज्यभरातून आणि शेजारच्या राज्यांतूनही भाविक येतात.

पहिल्या दिवशी देवीचा मंगल अभिषेक आणि घटस्थापना झाली. रात्री साडेसात वाजता माऊली गुरू यांचा, तर नऊ वाजता मुरलीधर भजनी मंडळाचा कार्यक्रम झाला. सोमवारी (ता. १२) स्वरांजली, दीपस्तंभ आणि वनेश्वर महिला भजनी मंडळांचे कार्यक्रम होणार आहेत.

मंगळवारी (ता. १३) सरस्वती भजनी मंडळ आणि शारदा माता महिला भजनी मंडळाचे भजन होणार असून रात्री साडेसात वाजता कराओके भक्तिसंगीताचा कार्यक्रम आहे. बुधवारी (ता. १४) सुकन्या आणि नागनाथ महिला भजनी मंडळांसह अष्टविनायक गुरुदेव भजनी मंडळाचा कार्यक्रम होणार आहे. पुढील दिवसांतही विविध भजनी मंडळांचे कार्यक्रम होणार आहेत.

माहिती स्रोत: तरुण भारत