कारंजा शहरात आता दर रविवारी पाणीपुरवठा बंद; नगरपंचायतीचा निर्णय

वर्धा : आगामी काळात पाणीटंचाई भासण्याची शक्यता लक्षात घेऊन जिल्ह्यातील कारंजा नगरपंचायतीने शहरातील पाणीपुरवठा दर रविवारी पूर्णपणे बंद ठेवण्याचा निर्णय घेतला आहे. नागरिकांनी पाणी जपून वापरावे, असे आवाहनही नगरपंचायतीने केले आहे.

नगरपंचायतीची नवी पाणीपुरवठा योजना सुरू झाल्यापासून शहराला मुबलक पाणी मिळत आहे. मात्र रस्त्यावर सडा मारणे, पिण्याच्या पाण्याने वाहने धुणे, गरज नसताना नळ सुरू ठेवणे अशा प्रकारे काही ठिकाणी पाण्याचा मोठा अपव्यय होत असल्याचे प्रशासनाच्या लक्षात आले आहे. पुरवठा सुरळीत आहे म्हणून अमर्याद वापर योग्य नाही; प्रत्येक थेंब वाचवणे ही नागरिक आणि प्रशासन दोघांची जबाबदारी असल्याचे नगरपंचायतीने म्हटले आहे.

घरातील गळती तातडीने दुरुस्त करावी आणि झाडांना गरजेपुरतेच पाणी द्यावे, असेही नगरपंचायतीने सुचवले आहे.

माहिती स्रोत: हिंदुस्थान समाचार