जालना जिल्ह्यातील ६७ लघु-मध्यम प्रकल्पांत केवळ ९.६९ टक्के पाणी; अंबड तालुक्यातील गल्हाटी प्रकल्प कोरडा

जालना : जिल्ह्यातील ७ मध्यम आणि ६० लघु प्रकल्पांमध्ये ऑक्टोबर महिन्यातच केवळ ९.६९ टक्के पाणीसाठा शिल्लक राहिला आहे. पेरणीनंतर मोठा पाऊस न झाल्याने प्रकल्पांतील साठा वाढला नाही. त्यामुळे विहिरी आणि बोअरची पाणीपातळीही झपाट्याने खाली गेली असून अनेक ठिकाणी त्या आताच आटल्या आहेत.

जिल्ह्यात १ जून ते ८ ऑक्टोबर या काळात ४५० मिमी पावसाची नोंद झाली, तर गतवर्षी याच काळात ८३७ मिमी पाऊस पडला होता. यंदा वार्षिक सरासरीच्या केवळ ६५ टक्के पाऊस झाला आहे. पिण्याच्या पाण्याचे संकट २०१२ च्या दुष्काळापेक्षाही गंभीर होण्याची भीती व्यक्त होत असून पाऊस न झाल्यास रब्बीची पेरणीही होणार नाही आणि जनावरांच्या चाऱ्याचा प्रश्न उभा राहील. आठही तालुक्यांतील तलावांमधून अवैध पाणी उपसा करणाऱ्यांवर प्रशासनाकडून कारवाई केली जात आहे.

अंबड तालुक्यातील सर्वांत मोठा जलसाठा असलेला बारसवाडा येथील गल्हाटी मध्यम प्रकल्प ऑक्टोबरमध्येच पूर्णपणे कोरडा पडला आहे. त्यामुळे शहापूरसह परिसरातील १० ते १५ गावांमध्ये शेतीसह माणसांच्या आणि जनावरांच्या पिण्याच्या पाण्याचा प्रश्न गंभीर झाला आहे. टँकरने पाणीपुरवठा, विहिरी-बोअरवेलची पाहणी आणि जनावरांसाठी स्वतंत्र पाण्याची व्यवस्था करावी, अशी मागणी ग्रामस्थ करत आहेत.

१९६६ पासून असलेल्या या प्रकल्पावर लाभक्षेत्रातील अनेक गावे, तांडे आणि वस्त्या अवलंबून आहेत. गोदावरी नदीतून उपसा सिंचन योजनेद्वारे प्रकल्पात पाणी आणावे, यासाठी स्थानिक शेतकरी १९८८ पासून पाठपुरावा करत असून गल्हाटी संघर्ष समितीने त्यासाठी आंदोलने, रास्ता रोको आणि उपोषणे केली आहेत. पाणी आणण्याचे आश्वासन केवळ निवडणुकीपुरते दिले जाते, अशी ग्रामस्थांची तक्रार आहे.

माहिती स्रोत: पुढारी; पुढारी