जलजीवनची कामे मुदतीत न करणारे ठेकेदार काळ्या यादीत; पालकमंत्री उदय सामंत यांचा इशारा

रत्नागिरी : रत्नागिरी-संगमेश्वर विधानसभा मतदारसंघात जलजीवन मिशनमधून सुरू असलेल्या नळपाणी योजनांची कामे मुदतीत पूर्ण न करणाऱ्या ठेकेदारांवर कडक कारवाई होईल आणि त्यांना काळ्या यादीत टाकले जाईल, असा इशारा उद्योगमंत्री आणि पालकमंत्री डॉ. उदय सामंत यांनी दिला. शासकीय विश्रामगृहात झालेल्या आढावा बैठकीत ते बोलत होते.

संभाव्य दुष्काळ लक्षात घेऊन जलजीवन मिशनची सर्व कामे युद्धपातळीवर पूर्ण करावीत आणि त्यासाठी महावितरण व ग्रामीण पाणीपुरवठा विभागाने समन्वय ठेवावा, असे सामंत यांनी सांगितले. योजनेच्या कामात कोणी विनाकारण अडथळा आणत असेल, तर त्याच्याविरोधात थेट पोलिसांत तक्रार द्यावी, असे निर्देशही त्यांनी प्रशासनाला दिले. मतदारसंघातील ठेकेदारांसह उपविभागीय अधिकारी जीवन देसाई, महावितरणचे अधीक्षक अभियंता सुधाकर जाधव आणि कार्यकारी अभियंता अमोल दाभोळकर बैठकीला उपस्थित होते.

याच दौऱ्यात सामंत यांनी शामराव पेजे शासकीय अभियांत्रिकी महाविद्यालयातील विद्यार्थ्यांशी संवाद साधला. प्राध्यापक व कर्मचाऱ्यांची कमतरता, व्यावसायिक प्रशिक्षणाचा अभाव आणि प्रयोगशाळांमधील अपुरी उपकरणे या अडचणी विद्यार्थ्यांनी मांडल्या. त्या प्राधान्याने सोडवण्याचे आश्वासन देत, महाविद्यालयात तांत्रिक महोत्सव आणि ऑटो एक्स्पोसारखी प्रदर्शने भरवण्यासाठी सरकारकडून सर्व मदत मिळेल, असेही त्यांनी सांगितले.

माहिती स्रोत: रत्नागिरी खबरदार