वसमतचे माजी आमदार पंडितराव देशमुख यांच्यावर अंत्यसंस्कार; शिक्षण आणि समाजकारणातील ज्येष्ठ व्यक्तिमत्त्व हरपले

वसमत : वसमत विधानसभा मतदारसंघाचे माजी आमदार आणि हुतात्मा बहिर्जी स्मारक शिक्षण संस्थेचे सचिव पंडितराव देशमुख यांच्या पार्थिवावर शुक्रवारी (ता. ९) दुपारी वसमत येथील वैकुंठधाम स्मशानभूमीत अंत्यसंस्कार करण्यात आले. नांदेड येथील रुग्णालयात उपचार सुरू असताना गुरुवारी (ता. ८) रात्री त्यांचे निधन झाले. २० ऑगस्ट १९४० रोजी जन्मलेले देशमुख मूळचे तालुक्यातील हट्टा येथील रहिवासी होते.

वापटी येथील बहिर्जी प्राथमिक विद्यालयात शिक्षक म्हणून कारकीर्द सुरू करणाऱ्या देशमुख यांनी पुढे वसमतच्या बहिर्जी स्मारक विद्यालयात मुख्याध्यापक म्हणून काम केले. आणीबाणीनंतर जनता पक्षाच्या तिकिटावर निवडून येऊन त्यांनी १९७८ ते १९८० या काळात विधानसभेत वसमतचे प्रतिनिधित्व केले. २००४ पासून ते बहिर्जी शिक्षण संस्थेचे सचिव होते, तसेच पूर्णा सहकारी साखर कारखान्याचे संचालक म्हणूनही त्यांनी जबाबदारी सांभाळली.

ग्रामीण भागातील मुलांना शिक्षणाची संधी मिळावी, यासाठी त्यांनी सातत्याने काम केले; साधी राहणी आणि स्वच्छ प्रतिमा ही त्यांची ओळख होती. आमदार राजू नवघरे आणि माजी मंत्री जयप्रकाश दांडेगावकर यांच्यासह विविध पक्षांच्या नेत्यांनी, शिक्षकांनी आणि विद्यार्थ्यांनी त्यांना श्रद्धांजली वाहिली. शिक्षक, लोकप्रतिनिधी आणि शिक्षण संस्थेचे पदाधिकारी म्हणून त्यांचे योगदान स्मरणात राहील, असे नवघरे म्हणाले. पत्नी, तीन मुले, सुना आणि नातवंडे असा त्यांचा परिवार आहे.

माहिती स्रोत: पुढारी; साम टीव्ही; सरकारनामा; सकाळ; सकाळ