दुष्काळात धाराशिवच्या रेशनवर तांदूळ कमी; शेजारी जिल्ह्यांत दोन किलो, इथे एकच किलो

कळंब : जिल्ह्यात दुष्काळ जाहीर झाल्याने शेतकरी आणि सर्वसामान्य कुटुंबे आर्थिक अडचणीत असताना रेशनवर मिळणाऱ्या धान्याच्या प्रमाणाबाबत नाराजी व्यक्त होत आहे. बीड, लातूर, सोलापूर आणि पुणे या लगतच्या जिल्ह्यांत प्राधान्य कुटुंबांतील प्रत्येक व्यक्तीला तीन किलो गहू आणि दोन किलो तांदूळ मिळत असल्याचे सांगितले जाते, तर धाराशिव जिल्ह्यात एक किलो तांदूळ आणि चार किलो गहू मिळत आहे.

पात्र लाभार्थ्यांना प्रतिव्यक्ती पाच किलो मोफत धान्य दिले जाते. अनेक कुटुंबांच्या रोजच्या आहारात तांदळाची गरज जास्त असल्याने गव्हाचे प्रमाण वाढवून तांदळाची घट भरून निघत नाही, असे लाभार्थ्यांचे म्हणणे आहे. गेल्या काही महिन्यांपासून हा बदल लागू असून तो कोणत्या शासन निर्णयानुसार आणि का केला, याचे स्पष्टीकरण अन्न व नागरी पुरवठा विभागाने द्यावे, अशी मागणी होत आहे.

अनेक कार्डधारक गहू कमी करून तांदूळ वाढवून मागतात; मात्र शासनाकडून मिळणाऱ्या धान्याचेच नियमानुसार वाटप करावे लागते आणि प्रमाण बदलण्याचा अधिकार आमच्याकडे नाही, असे रेशन दुकानदार किरण बोराडे यांनी सांगितले. पूर्वी दोन किलो तांदूळ आणि तीन किलो गहू मिळायचा; आम्हाला गव्हापेक्षा तांदळाची जास्त गरज आहे, असे वाकडी येथील लाभार्थी ताई काळे म्हणाल्या.

माहिती स्रोत: सकाळ