दुष्काळामुळे अकोला जिल्ह्यातील तरणतलाव बंद; नवीन विहिरी, कूपनलिका आणि जलप्रकल्पांतून उपशावर बंदी

अकोला : ‘एल निनो’च्या प्रभावामुळे यंदा कमी पाऊस झाल्याने जिल्ह्यातील भूजल पातळीत मोठी घट झाली असून हिवाळ्यापूर्वीच पाणीटंचाई जाणवू लागली आहे. या पार्श्वभूमीवर जिल्हाधिकारी वर्षा मीना यांनी सुधारित प्रतिबंधात्मक आदेश लागू केला असून त्यानुसार जिल्ह्यातील तरणतलाव तातडीने बंद करण्यात आले आहेत. हा आदेश टंचाई कालावधी संपेपर्यंत संपूर्ण जिल्ह्यात लागू राहणार आहे.

नवीन विहिरी आणि कूपनलिका खोदणे, जलप्रकल्पांतून शेती व उद्योगांसाठी पाणी उपसणे आणि सार्वजनिक बांधकामांसाठी पाणी वापरणे यावरही बंदी घालण्यात आली आहे. पिण्याच्या पाण्याच्या कोणत्याही सार्वजनिक स्रोताभोवती ५०० मीटरच्या आत, मग ते शहर असो वा गाव, खासगी किंवा व्यावसायिक वापरासाठी नवी विहीर किंवा कूपनलिका खोदण्यास पूर्ण मनाई असेल. परवानगीशिवाय खोदकाम केल्यास यंत्रे आणि साहित्य जप्त करून कायदेशीर कारवाई केली जाईल.

लहान, मध्यम आणि मोठ्या शासकीय जलप्रकल्पांसह नद्या, नाले आणि कोल्हापुरी बंधाऱ्यांतून उद्योग, व्यवसाय आणि शेती सिंचनासाठी होणारा उपसा तातडीने थांबवण्यात आला आहे. उपलब्ध पाणीसाठा केवळ पिण्यासाठी (टँकर भरणे, प्रादेशिक नळ योजना) आणि पशुधनासाठी राखीव ठेवण्यात आला आहे.

माहिती स्रोत: लोकसत्ता