बोरिवली–मालाड मलजल बोगद्याचे अंतिम ‘ब्रेक-थ्रू’ पूर्ण; प्रकल्पाचे ९० टक्के काम पूर्ण

मुंबई : पश्चिम उपनगरांतील मलनिःसारण यंत्रणेवरील ताण कमी करणाऱ्या महानगरपालिकेच्या ‘प्राधान्य मलजल बोगदा टप्पा-१’ प्रकल्पाने शुक्रवारी महत्त्वाचा टप्पा गाठला. बोरिवलीतील डॉन बॉस्को स्कूल जंक्शन ते मालवणीतील नवीन मालाड उदंचन केंद्र या ५.८ किलोमीटर लांबीच्या भूमिगत बोगद्याचे अंतिम ‘ब्रेक-थ्रू’ डॉन बॉस्को स्कूल जंक्शन येथे पूर्ण झाले. प्रकल्पाचे ९० टक्के काम झाले असून ३१ जुलै २०२७ पर्यंत तो पूर्ण करण्याचे उद्दिष्ट आहे.

बोगद्याचे खोदकाम मालाड उदंचन केंद्राकडून बोरिवलीच्या दिशेने ‘सेगमेंटल लायनिंग’ तंत्राने करण्यात आले. बोगद्याचा अंतर्गत व्यास ३.२ मीटर असून दररोज १,१८२ दशलक्ष लिटर मलजल वाहून नेण्याची त्याची क्षमता आहे. प्रकल्पात पाच शाफ्ट, तीन ड्रॉप शाफ्ट आणि सहा स्क्रीन चेंबर आहेत.

आर दक्षिण, आर मध्य, आर उत्तर आणि पी उत्तर विभागाच्या काही भागांतील दहिसर, बोरिवली, गोराई, चारकोप, मालाड आणि कांदिवली परिसरातील सध्याच्या मलवाहिन्या वाढत्या मलजलासाठी अपुऱ्या पडत असून त्या सतत क्षमतेपेक्षा जास्त भाराखाली असतात. नव्या बोगद्यामुळे दहिसर, बोरिवली, गोराई, शिंपोली आणि चारकोप परिसरातील मलजल वहन क्षमता दररोज १,१३६ दशलक्ष लिटरपर्यंत वाढेल.

गोराई, शिंपोली, चारकोप आणि मालाड या चार उदंचन केंद्रांकडे जाणारे मलजल थेट या बोगद्यात घेतले जाणार असल्याने ही केंद्रे लागणार नाहीत आणि त्यांच्या देखभालीचा खर्च वाचेल. समुद्र आणि नद्यांमध्ये सोडल्या जाणाऱ्या पाण्याची गुणवत्ता सुधारून जलप्रदूषणाला आळा घालणे हा मुंबई मलनिःसारण प्रकल्प विभागामार्फत राबवल्या जाणाऱ्या या प्रकल्पाचा उद्देश आहे.

माहिती स्रोत: लोकसत्ता; नवशक्ती