बोरगाव मंजूजवळ राष्ट्रीय महामार्गावर धावत्या खाद्यतेलाच्या ट्रकला आग; चालक, वाहक सुखरूप

अकोला : अकोल्याहून अमरावतीकडे खाद्यतेल घेऊन निघालेल्या एका मालवाहू ट्रकने शनिवारी (ता. १०) सायंकाळी राष्ट्रीय महामार्ग ५३ वर बोरगाव मंजूजवळ अचानक पेट घेतला. हा भाग बोरगाव मंजू पोलीस ठाण्याच्या हद्दीत येतो. बघता बघता आग भडकली आणि ट्रकसह त्यातील सारा माल जळून खाक झाला.

आगीची बाब लक्षात येताच चालकाने प्रसंगावधान राखले आणि चालक व वाहक दोघेही ट्रकमधून सुरक्षित बाहेर पडले. ट्रकमध्ये खाद्यतेल असल्याने आग विझवणे आव्हानात्मक ठरले. या घटनेमुळे महामार्गावर खळबळ उडाली आणि वाहतूक काही काळ विस्कळित झाली.

घटनेची माहिती मिळताच बोरगाव मंजू पोलीस ठाण्याचे हेडकॉन्स्टेबल महादेव पातोंड आणि नारायण शिंदे घटनास्थळी पोहोचले. महामार्गावरील विस्कळित वाहतूक पुन्हा सुरळीत करण्यासाठी पोलिसांनी प्रयत्न केले. धावत्या ट्रकला लागलेल्या या आगीमुळे परिसरातील वाहनचालकांमध्ये काही काळ घबराट पसरली होती.

माहिती स्रोत: हिंदुस्थान समाचार