अमरावतीच्या अंबादेवी, एकवीरा देवी मंदिरांत नवरात्रोत्सवाला सुरुवात; पहिल्याच दिवशी भाविकांची गर्दी

अमरावती : विदर्भाचे श्रद्धास्थान असलेल्या श्री अंबादेवी आणि श्री एकवीरा देवी संस्थानच्या शारदीय नवरात्रोत्सवाला रविवारी (ता. ११) प्रारंभ झाला. पहिला दिवस रविवार असल्याने सकाळपासूनच मंदिरांत दर्शनासाठी भाविकांची गर्दी होती. नऊ दिवसांत अभिषेक, प्रवचन, कीर्तन, भजन, सप्तशतीचे पाठ, नवचंडी यज्ञ आणि महाप्रसाद असे धार्मिक कार्यक्रम होणार आहेत.

श्री अंबादेवी मंदिरात पहाटे साडेचार वाजता सहस्रधारा महाभिषेक झाला. पाठोपाठ संस्थानचे सचिव रवींद्र कर्वे यांनी पत्नीसह घटस्थापना केली आणि सकाळी साडेआठ वाजता डॉ. जयंत पांढरीकर यांच्या हस्ते ध्वजारोहण झाले. संस्थानची गेल्या ४५ वर्षांपासून अखंड सुरू असलेली प्रवचनमाला हे उत्सवाचे विशेष आकर्षण आहे. यंदा ११ ते १९ ऑक्टोबरदरम्यान रोज सकाळी साडेआठ ते दहा या वेळेत सचिन देव महाराज यांचे प्रवचन होणार आहे.

जिल्ह्यातील प्रमुख देवी मंदिरांतही भाविकांच्या सोयीसाठी विशेष नियोजन करण्यात आले आहे. श्री अंबिका देवी मंदिरात यंदा १५०० दिव्यांचा दीपोत्सव साजरा होणार असल्याने उत्सवाला वेगळी झळाळी मिळणार आहे.

माहिती स्रोत: हिंदुस्थान समाचार; हिंदुस्थान समाचार