अकोला स्थानकावर धावत्या गाडीतून घसरणाऱ्या दिव्यांग वृद्धाला आरपीएफच्या महिला अधिकाऱ्याने वाचवले

अकोला : रेल्वे सुरक्षा दलाच्या ‘ऑपरेशन जीवन रक्षा’ अंतर्गत अकोला रेल्वे स्थानकावर एका दिव्यांग वृद्ध प्रवाशाचे प्राण वाचवल्याचे सीसीटीव्ही चित्रण समोर आले आहे. फलाट क्रमांक दोनवरून गाडी क्रमांक १२६५५ नवजीवन एक्स्प्रेस सुटत असताना या प्रवाशाने धावत्या गाडीत चढण्याचा प्रयत्न केला. त्याच वेळी त्यांचा तोल गेला आणि ते फलाट व गाडीमधील फटीत घसरू लागले.

कर्तव्यावर असलेल्या महिला सहायक उपनिरीक्षक सोनल इंगळे यांनी प्रसंग ओळखून क्षणाचाही विलंब न लावता धाव घेतली आणि उपस्थित प्रवाशांच्या मदतीने वृद्धाला घट्ट पकडून फलाटाच्या बाजूला सुखरूप ओढले. या तत्परतेमुळे मोठा अनर्थ टळला. प्रवाशाला किरकोळ खरचटले.

हे ६३ वर्षीय प्रवासी गडचिरोलीचे रहिवासी असून त्यांच्याकडे अकोला ते चंद्रपूर प्रवासाचे तिकीट होते. नवरात्रोत्सवाच्या सुरुवातीलाच ‘पोलिसाच्या वेशातील दुर्गा’ अशा शब्दांत इंगळे यांच्या धाडसाचे कौतुक होत आहे.

माहिती स्रोत: तरुण भारत