हिवरड्याच्या पार्थसारथी मुंडेला राष्ट्रीय लॉन टेनिस स्पर्धेत १८ वर्षांखालील गटात अजिंक्यपद

भूम : तालुक्यातील हिवरडा गावची पार्थसारथी अरुण मुंडे हिने दिल्लीत झालेल्या राष्ट्रीय लॉन टेनिस स्पर्धेत १८ वर्षांखालील गटात अजिंक्यपद मिळवले आहे. ग्रामीण भागातून पुढे येत राष्ट्रीय स्तरावर मिळवलेल्या या यशामुळे हिवरड्यासह भूम तालुका आणि धाराशिव जिल्ह्याचे नाव उंचावले आहे.

दिल्ली लॉन टेनिस असोसिएशन आणि ऑल इंडिया टेनिस असोसिएशनने मिळून ५ ते १० ऑक्टोबरदरम्यान ही स्पर्धा भरवली होती. त्यात देशभरातील ६४ अव्वल मानांकित खेळाडू सहभागी झाले होते. चुरशीच्या लढतींमध्ये सातत्यपूर्ण खेळ आणि तांत्रिक कौशल्याच्या जोरावर पार्थसारथीने विजेतेपदावर नाव कोरले.

पार्थसारथी सध्या पुण्यातील बालेवाडी क्रीडा संकुलात नियमित सराव करते. शिस्त, सातत्य, शारीरिक क्षमता आणि मानसिक तयारीवर तिचा भर असतो. तिचे यश जिल्ह्यातील उदयोन्मुख खेळाडूंसाठी प्रेरणादायी ठरत आहे.

माहिती स्रोत: सकाळ