वेंगुर्ल्यात वृद्धेच्या घरातून चोरीला गेलेले २० लाखांचे सोन्याचे दागिने हस्तगत

वेंगुर्ला : तालुक्यातील दाबोली-मोबारवाडी येथे एका ७२ वर्षीय महिलेच्या घरातून चोरीला गेलेले सुमारे ५१५ ग्रॅम सोन्याचे दागिने वेंगुर्ला पोलिसांनी हस्तगत केले आहेत. त्यांची किंमत सुमारे २० लाख रुपये आहे. पत्रकार परिषदेत जिल्हा पोलीस अधीक्षक मोहन दहिकर यांनी याबाबत माहिती दिली.

घरातून विविध प्रकारचे सोन्याचे दागिने चोरीला गेल्याची तक्रार संबंधित महिलेने २३ सप्टेंबर रोजी वेंगुर्ला पोलीस ठाण्यात दिली होती. त्यानुसार भारतीय न्याय संहितेच्या कलम ३०५ अन्वये गुन्हा नोंदवण्यात आला. पोलीस निरीक्षक निसर्ग ओतारी यांच्या मार्गदर्शनाखाली तांत्रिक तपास आणि गोपनीय माहितीच्या आधारे शोध सुरू होता.

तक्रारदार महिलेच्या घरी घरकाम करणाऱ्या २७ वर्षीय महिलेच्या हालचाली संशयास्पद वाटल्याने पोलिसांनी तिला चौकशीसाठी ताब्यात घेतले. चौकशीत तिने चोरीची कबुली दिल्याचे पोलिसांनी सांगितले. त्यानंतर तिच्या घराशेजारील एका पडक्या घरातून दोन पंचांच्या उपस्थितीत सर्व दागिने जप्त करण्यात आले.

अपर पोलीस अधीक्षक नयोमी साटम, सावंतवाडीचे उपविभागीय पोलीस अधिकारी राजेश भागवत आणि अधीक्षक दहिकर यांच्या मार्गदर्शनाखाली ही कारवाई झाली.

माहिती स्रोत: तरुण भारत