जळगाव पोलिसांकडून ६५.७० कोटींचे अमली पदार्थ नष्ट; रांजणगाव एमआयडीसीत प्रक्रिया

जळगाव : जिल्ह्यातील दोन गुन्ह्यांमध्ये जप्त केलेले सुमारे ६५ कोटी ७० लाख रुपये किमतीचे अमली पदार्थ जळगाव पोलिसांनी शुक्रवारी (९ ऑक्टोबर) नष्ट केले. त्यात अ‍ॅम्फेटामाइन आणि मेथाक्वालोन या पदार्थांचा समावेश होता. पुणे जिल्ह्यातील रांजणगाव एमआयडीसीतील एका अधिकृत घातक कचरा प्रक्रिया केंद्रात ही प्रक्रिया पार पडली.

त्या दिवशी जिल्हापेठ पोलिस ठाण्याच्या स्ट्राँग रूममधून सीलबंद मुद्देमाल पंचांसमक्ष आणि वजन-मापे निरीक्षक गौतम बावस्कर यांच्या उपस्थितीत बाहेर काढण्यात आला आणि पोलिस बंदोबस्तात रांजणगावला नेण्यात आला. जिल्हास्तरीय अमली पदार्थ मुद्देमाल नाश समितीने प्रस्तावाची पडताळणी करून मान्यता दिल्यानंतर नियमांनुसार ही प्रक्रिया पूर्ण झाली. संपूर्ण प्रक्रियेचे व्हिडिओ चित्रीकरण करण्यात आले.

सर्वोच्च न्यायालयाचे निर्देश, केंद्र सरकारचे नियम आणि राज्याचे पोलिस महासंचालक तसेच अमली पदार्थविरोधी कृती दलाच्या सूचनांनुसार जप्त अमली पदार्थ नष्ट करण्याचे आदेश देण्यात आले होते. त्यानुसार स्थानिक गुन्हे शाखेने मुद्देमालाचा आढावा घेऊन कार्यवाही केली.

पोलिस अधीक्षक श्रीकांत धिवरे यांच्या अध्यक्षतेखालील समितीच्या उपस्थितीत, अपर पोलिस अधीक्षक संदीप गावित आणि चाळीसगावचे अपर पोलिस अधीक्षक अशोक नखाते यांच्या मार्गदर्शनाखाली ही कारवाई झाली. पोलिस उपअधीक्षक (गृह) संजय गायकवाड आणि पोलिस निरीक्षक राहुल गायकवाड या वेळी उपस्थित होते.

माहिती स्रोत: जळगाव लाइव्ह न्यूज