गाढेजळगाव शिवारात कपाशीआड गांजाची शेती; ४३० झाडे जप्त, शेतकऱ्याला अटक

करमाड : छत्रपती संभाजीनगर तालुक्यातील गाढेजळगाव शिवारात कपाशीच्या पिकात लपवून लावलेली गांजाची झाडे करमाड पोलिसांनी शुक्रवारी (ता. ९) सकाळी छापा टाकून जप्त केली. लहान-मोठ्या ४३० झाडांचे वजन ७२ किलो ७८० ग्रॅम भरले असून त्यांची अंदाजे किंमत १८ लाख १९ हजार ५०० रुपये आहे. या प्रकरणी गाढेजळगाव येथील ५० वर्षीय शेतकऱ्याला अटक करण्यात आल्याचे पोलिसांनी सांगितले.

गट क्रमांक ३३३ मधील शेतात गांजाची लागवड झाल्याची गोपनीय माहिती पोलिसांना मिळाली होती. पोलीस निरीक्षक सम्राटसिंग राजपूत यांनी वरिष्ठांना कळवून कारवाईची आखणी केली. पोलीस पथक, न्यायवैद्यक प्रयोगशाळेचे (एफएसएल) अधिकारी आणि पंचांच्या उपस्थितीत शेतात छापा टाकण्यात आला, तेव्हा कपाशीच्या ओळींमध्ये तीन ते चार फूट उंचीची गांजाची झाडे आढळली.

पंचांसमक्ष झाडे उपटून इलेक्ट्रॉनिक काट्यावर त्यांचे वजन करण्यात आले. प्रयोगशाळेतील तपासणीसाठी नमुने स्वतंत्र ठेवून उर्वरित झाडे पोत्यांत भरून सील करण्यात आली. संशयिताविरुद्ध अमली पदार्थ प्रतिबंधक (एनडीपीएस) कायदा १९८५ नुसार गुन्हा दाखल झाला आहे.

उपविभागीय पोलीस अधिकारी पूजा नांगरे, तहसीलदार शिवानंद बिडवे आणि मंडळ अधिकारी संतोष लोळगे यांनी हा प्रकार समोर आल्यावर शेताची पाहणी केली. सहायक पोलीस निरीक्षक गोकुळ ठाकूर यांच्या पथकाने ही कारवाई केली. या लागवडीत आणखी कोणाचा सहभाग आहे का आणि गांजा विक्रीचे नियोजन होते का, याचा तपास करमाड पोलीस करत आहेत.

माहिती स्रोत: सकाळ