धुळ्यात बनावट दारूच्या कारखान्यावर छापा; १,६०० बाटल्यांसह १.१४ लाखांचा मुद्देमाल जप्त

धुळे : साक्री रोडवर विद्यावर्धिनी महाविद्यालयाच्या मागे असलेल्या जलसिंचन सोसायटीतील एका प्लॉटमध्ये बनावट दारू तयार केली जात होती. तेथे शहर पोलिसांनी शुक्रवारी (९ ऑक्टोबर) रात्री सुमारे आठ वाजता छापा टाकला. या कारवाईत देशी दारूच्या १,६०० बाटल्या, स्पिरीट, स्टिकर, बूच आणि सील पॅकिंग करण्याचे यंत्र असा एकूण १ लाख १४ हजार १०० रुपयांचा मुद्देमाल जप्त करण्यात आला.

हा प्लॉट सुरत बायपास महामार्गालगत असून तेथे दारू बनवली जात असल्याची खबर पोलिसांना मिळाली होती. जप्त साहित्यात सुमारे ६४ हजारांच्या बाटल्या आणि ३५ हजारांचे स्पिरीट आहे.

या प्रकरणी ३६ वर्षीय संशयिताविरुद्ध गुन्हा दाखल करण्यात आला आहे. विभागीय पोलिस अधिकारी राजकुमार उपासे, सहायक पोलिस निरीक्षक पल्लवी टर्ले यांच्यासह पथकाने ही कारवाई केली.

माहिती स्रोत: सकाळ