एल निनोमुळे बाधित शेतकऱ्यांना बँकांनी कर्जपुरवठा करावा; नंदुरबारमध्ये नाबार्डच्या कार्यशाळेत अपर जिल्हाधिकाऱ्यांच्या सूचना

नंदुरबार : यंदा एल निनोच्या प्रभावामुळे शेती क्षेत्रावर गंभीर परिणाम होण्याची शक्यता आहे. अशा वेळी बाधित शेतकऱ्यांना सकारात्मक दृष्टीने बँकिंग आणि कर्जसुविधा देणे ही बँकांची जबाबदारी असून थकीत कर्जवसुलीबाबत राज्य सरकारने दिलेल्या सूचनांचे सर्व बँकांनी काटेकोर पालन करावे, असे निर्देश अपर जिल्हाधिकारी धनंजय गोगटे यांनी दिले. नाबार्डतर्फे नंदुरबार येथे झालेल्या वरिष्ठ बँकर्स कार्यशाळेत ते बोलत होते.

कृषी वित्तपुरवठा आणि हवामानाची आव्हाने या विषयावरील या कार्यशाळेला जिल्ह्यातील विविध बँकांचे ४० हून अधिक जिल्हा समन्वयक आणि शाखा व्यवस्थापक उपस्थित होते. नाबार्डचे जिल्हा विकास व्यवस्थापक रवींद्र मोरे यांनी किसान क्रेडिट कार्डच्या व्याप्तीबाबत सादरीकरण केले. नियमित शेतकऱ्यांसोबतच वनहक्कधारक, पशुपालक, शेळीपालक आणि मत्स्यपालकांनाही या प्रणालीशी जोडावे, तसेच ॲग्री ड्रोन, पॉवर टिलर, शेतकरी उत्पादक संस्था आणि बचत गटांना पतपुरवठ्याच्या संधी आहेत, असे त्यांनी सांगितले.

मुख्यमंत्री रोजगार निर्मिती कार्यक्रमातील प्रकरणांना बँकांनी सर्वोच्च प्राधान्य देऊन प्रलंबित अर्ज लवकर निकाली काढावेत, अशी सूचना अग्रणी बँकेचे जिल्हा व्यवस्थापक नंदकुमार पैठणकर यांनी केली. महिला बचत गटांचे पतजोडणी उद्दिष्ट पूर्ण केल्याबद्दल जिल्हा अभियान अधिकारी यशवंत ठाकूर यांनी बँकर्सचे अभिनंदन केले.

जिल्हा उद्योग केंद्राचे गिरीश चौधरी, जिल्हा परिषदेचे लेखा अधिकारी संतोष पावले आणि ग्रामीण स्वयंरोजगार प्रशिक्षण संस्थेचे संचालक प्रमोद शिंदे यांनीही विविध योजनांबाबत मार्गदर्शन केले.

माहिती स्रोत: सकाळ