रत्नागिरीतील प्राथमिक आरोग्य केंद्रांत सीसीटीव्ही; पहिल्या टप्प्यात काही केंद्रांत प्रायोगिक तत्त्वावर

रत्नागिरी : जिल्ह्यातील प्राथमिक आरोग्य केंद्रांमध्ये सुरक्षेसाठी सीसीटीव्ही कॅमेरे बसवण्याचा निर्णय जिल्हा परिषदेच्या आरोग्य समितीच्या बैठकीत घेण्यात आला. जिल्ह्यातील ६० केंद्रांपैकी काहींमध्ये पहिल्या टप्प्यात प्रायोगिक तत्त्वावर कॅमेरे लावले जातील आणि त्यानंतर उर्वरित केंद्रांत टप्प्याटप्प्याने ते बसवले जातील, अशी माहिती जिल्हा परिषदेचे उपाध्यक्ष आणि आरोग्य सभापती विलास चाळके यांनी दिली.

मुंबई, पुण्यासारख्या शहरांत स्वाईन फ्लूचे रुग्ण वेगाने वाढत असल्याने जिल्ह्यात त्याचा प्रसार होऊ नये म्हणून तालुक्याच्या ठिकाणी तातडीने जनजागृती करावी, अशा सूचना बैठकीत देण्यात आल्या. येत्या २७ ऑक्टोबरला जिल्ह्यात जंतनाशक मोहीम राबवण्याचे आदेशही देण्यात आले.

लवकरच भात कापणी सुरू होणार असून त्या काळात सर्पदंशाच्या घटना वाढतात. त्यामुळे प्राथमिक आरोग्य केंद्रांमध्ये सर्पदंशावरील लसींचा पुरेसा साठा ठेवावा आणि रुग्णांची गैरसोय होऊ देऊ नये, असे चाळके यांनी सांगितले.

माहिती स्रोत: रत्नागिरी खबरदार; पुढारी