मराठवाडा पदवीधर मतदारसंघात ४१ उमेदवार रिंगणात; प्रतिज्ञापत्रानुसार प्रतापसिंह पाटील सर्वांत श्रीमंत

छत्रपती संभाजीनगर : विधान परिषदेच्या मराठवाडा पदवीधर मतदारसंघात अर्ज मागे घेण्याच्या शेवटच्या दिवशी, शुक्रवारी (ता. ९) १३ उमेदवारांनी माघार घेतली. त्यामुळे आता ४१ उमेदवार रिंगणात असून प्रचाराला सुरुवात झाली आहे. २३ ऑक्टोबरला सकाळी आठ ते दुपारी चार या वेळेत मतदान होणार असून २७ ऑक्टोबरला मतमोजणी होईल.

महायुतीचे उमेदवार आणि सलग तीन वेळा या मतदारसंघातून निवडून आलेले आमदार सतीश चव्हाण (राष्ट्रवादी काँग्रेस), शिवसेनेचे (उद्धव बाळासाहेब ठाकरे) दिलीप घुगे आणि राष्ट्रवादी काँग्रेसचे (शरदचंद्र पवार) प्रतापसिंह पाटील यांच्यात प्रमुख लढत होईल. घुगे आणि पाटील या दोघांनीही अर्ज कायम ठेवल्याने महाविकास आघाडीत मैत्रीपूर्ण लढत होणार आहे. भाजपचे बंडखोर एम. के. देशमुख यांनी मात्र माघार घेतली.

उमेदवारांनी निवडणूक आयोगाला सादर केलेल्या प्रतिज्ञापत्रांनुसार प्रतापसिंह पाटील रिंगणातील सर्वांत श्रीमंत उमेदवार आहेत. त्यांनी ४८ कोटी २४ लाख रुपयांची मालमत्ता जाहीर केली असून त्यात ८ कोटी ९० लाखांची जंगम आणि ३९ कोटी ३४ लाखांची स्थावर मालमत्ता आहे. त्यांच्याकडे २५ लाख आणि पत्नीकडे २० लाख रुपये रोख आहेत.

चौथ्यांदा निवडणूक लढवणारे सतीश चव्हाण यांनी पती-पत्नीच्या नावे मिळून ३८ कोटी रुपयांची जंगम व स्थावर मालमत्ता जाहीर केली आहे. त्यात सुमारे २५ कोटींची शेतजमीन, भूखंड आणि इतर मालमत्ता आहे, तर दोघांच्या नावे ६ कोटी रुपयांचे कर्ज आहे. दिलीप घुगे यांची एकूण मालमत्ता १ कोटी २६ लाख रुपये असून त्यात १ कोटी १३ लाखांची स्थावर आणि १३ लाखांची जंगम मालमत्ता आहे.

माहिती स्रोत: पुढारी; साम टीव्ही