जुन्याच विहिरीला रंग देऊन १० ते १५ लाखांचा अपहार केल्याचा आरोप; आरोंद्यातील जलार्पणावरून वाद

सावंतवाडी : जलजीवन मिशनअंतर्गत आरोंदा येथे गांधी जयंतीनिमित्त झालेल्या जलार्पण कार्यक्रमावरून वाद निर्माण झाला आहे. नवी विहीर न बांधता जुन्याच विहिरीला रंग देऊन ती नवी दाखवण्यात आली आणि त्यातून १० ते १५ लाख रुपयांचा अपहार झाला, असा आरोप उबाठा शिवसेनेचे सावंतवाडी विधानसभा मतदारसंघ प्रमुख रूपेश राऊळ यांनी पत्रकार परिषदेत केला.

राऊळ यांच्या म्हणण्यानुसार, आरोंदा-जाधववाडीसाठी २००९ मध्ये यशवंत ग्राम समृद्धी योजनेतून ९ लाख रुपये खर्चून विहीर बांधण्यात आली होती. जलजीवन मिशनमध्ये नवी विहीर अपेक्षित असताना याच जुन्या विहिरीची रंगरंगोटी करून जलार्पण करण्यात आले. ‘नवी विहीर गेली कुठे?’ असा सवाल त्यांनी केला.

माजी उपसरपंच आबा केरकर यांच्यासह काही स्थानिक लोकप्रतिनिधींनी कार्यक्रमाबाबत आधीच हरकती नोंदवल्या होत्या; तरीही ग्रामस्थ आणि ग्रामपंचायत सदस्यांना विश्वासात न घेता जिल्हा परिषद पदाधिकाऱ्यांच्या उपस्थितीत कार्यक्रम उरकण्यात आला, असे राऊळ यांनी सांगितले.

या प्रकरणी गटविकास अधिकाऱ्यांकडे लेखी तक्रार देण्यात आली असून दोषी अधिकारी, पदाधिकारी आणि ठेकेदारांवर कारवाई करावी आणि जबाबदार अधिकाऱ्यांना निलंबित करावे, अशी मागणी राऊळ यांनी केली. पत्रकार परिषदेला उबाठा शिवसेनेचे तालुका प्रमुख राजू शेटकर यांच्यासह पदाधिकारी उपस्थित होते.

माहिती स्रोत: पुढारी