वडूजमध्ये चोरट्यांचा धुमाकूळ; मध्यरात्री दोन दुकाने आणि दोन घरे फोडली

वडूज : खटाव तालुक्याचे मुख्यालय असलेल्या वडूज शहरात अज्ञात चोरट्यांनी मध्यरात्री दोन दुकाने आणि दोन घरे फोडली. या घटनांत सुमारे ३५ हजार रुपयांचे मणी-मंगळसूत्र, पाच हजारांची रोकड आणि दोन मोबाईल संच चोरीला गेले. सलग दुसऱ्या दिवशी चोरीच्या घटना घडल्याने नागरिक आणि व्यापाऱ्यांमध्ये भीतीचे वातावरण आहे.

वडूज-कराड रस्त्यावरील एका किराणा दुकानाचे शटर रात्री एकच्या सुमारास उचकटून चोरट्यांनी पाच हजारांची रोकड आणि एक मोबाईल लंपास केला. दुकानातील सीसीटीव्ही कॅमेऱ्यात चार संशयित कैद झाले आहेत. जवळच्या एका स्टेशनरी दुकानातही चोरीचा प्रयत्न झाला. मुख्य बाजारपेठेलगतच्या एका बंद घरातून मंगळसूत्र चोरीला गेले, तर धान्य बाजार परिसरातील एका परप्रांतीय कामगाराचे बंद घर फोडून साहित्याची उलथापालथ करण्यात आली.

दोन दिवसांपूर्वी पहाटे बाजार समितीच्या उपसभापतींच्या निवासस्थानी सहा ते सात शस्त्रधारी चोरट्यांनी दरोड्याचा प्रयत्न केला होता. त्याआधीच्या आठवड्यात कुरोली फाटा येथे बँकेचे एटीएम फोडून लाखो रुपये लंपास झाले होते.

वाढत्या घटनांमुळे पोलिसांच्या गस्तीबाबत प्रश्न उपस्थित होत असून रात्रीची गस्त वाढवावी आणि शहरासाठी सक्रिय बीट अंमलदार नेमावेत, अशी मागणी नागरिक करत आहेत.

माहिती स्रोत: पुढारी