तामसा येथे घरफोडीत दोन लाखांचा ऐवज लंपास; हिमायतनगर परिसरातून तीन म्हशी चोरीला

नांदेड : तामसा गावातील संभाजीनगर परिसरात चोरट्यांनी एका घराचे कुलूप तोडून कपाटातील सोन्या-चांदीचे दागिने व रोकड मिळून २ लाख ४ हजार रुपयांचा ऐवज लंपास केला. शुक्रवारी (ता. ९) पहाटे तीनच्या सुमारास ही घटना घडली. याप्रकरणी तामसा पोलीस ठाण्यात गुन्हा दाखल झाला असून सहायक पोलीस निरीक्षक खेडकर तपास करत आहेत.

हिमायतनगर तालुक्यातील घारापूर शिवारात शेतातील आखाड्यावर बांधलेल्या तीन म्हशी चोरट्यांनी पळवल्या. त्यांची किंमत १ लाख ६५ हजार रुपये आहे. ८ ऑक्टोबरच्या सायंकाळी सात ते ९ ऑक्टोबरच्या सकाळी सहा या वेळेत ही चोरी झाली. हिमायतनगर पोलीस ठाण्यात गुन्हा नोंदवण्यात आला आहे.

दरम्यान, नांदेड शहरात विनापरवाना वाळू वाहतूक करणाऱ्या दोन टेम्पोंवर इतवारा आणि वजिराबाद पोलिसांनी शुक्रवारी कारवाई केली. मंढई हनुमान मंदिर रस्त्यावर पहाटे पावणेचारच्या सुमारास आणि हस्सापूर रस्त्यावर दुपारी दीडच्या सुमारास प्रत्येकी एक ब्रास वाळू घेऊन जाणारे टेम्पो पकडण्यात आले. दोन्ही प्रकरणी गुन्हे दाखल झाले आहेत.

माहिती स्रोत: सकाळ