नांदेड परिक्षेत्रात अवैध धंद्यांविरोधी मोहिमेच्या पहिल्या आठवड्यात २२२ कारवाया; ३.३१ कोटींचा मुद्देमाल जप्त

नांदेड : पोलीस उपमहानिरीक्षक शहाजी उमाप यांच्या मार्गदर्शनाखाली नांदेड परिक्षेत्रातील नांदेड, हिंगोली, परभणी आणि लातूर जिल्ह्यांत १ ते ३१ ऑक्टोबरदरम्यान ‘अवैध व्यवसाय निर्मूलन मोहीम-४’ राबवली जात आहे. मोहिमेच्या पहिल्या आठवड्यात, म्हणजे १ ते ७ ऑक्टोबरदरम्यान २२२ कारवाया करून ३३५ जणांवर गुन्हे दाखल करण्यात आले आणि ३ कोटी ३१ लाख ३० हजार २४६ रुपयांचा मुद्देमाल जप्त करण्यात आला.

गुटख्याविरोधातील तीन कारवायांत ४.४७ लाख रुपयांचा माल, मटका आणि जुगाराच्या ४० कारवायांत १७.३० लाख रुपयांची रोकड व साहित्य, दारूबंदी कायद्यानुसारच्या १३७ कारवायांत ८.४५ लाख रुपयांचा माल आणि शस्त्र अधिनियमाच्या सहा प्रकरणांत ३३,८०० रुपयांचा माल जप्त झाला. इतर ३६ गुन्ह्यांत तीन कोटींहून अधिक किमतीचा साठा हाती लागला.

उपमहानिरीक्षक कार्यालयाच्या विशेष पथकाने हिंगोली जिल्ह्यातील औंढा नागनाथ येथे गुटख्याविरोधात, नांदेड जिल्ह्यातील उस्माननगर येथे जुगाराविरोधात आणि लातूर जिल्ह्यातील अहमदपूर येथे मटक्याविरोधात छापे टाकले.

नागरिकांना आपल्या परिसरातील अवैध धंद्यांची माहिती थेट उपमहानिरीक्षक कार्यालयाला देता यावी, यासाठी ९१५०१००१०० या क्रमांकाची ‘खबर’ हेल्पलाइन सुरू करण्यात आली आहे. नागरिकांनी निर्भयपणे माहिती द्यावी, असे आवाहन उमाप यांनी केले आहे.

माहिती स्रोत: पुढारी