मनोरजवळ टेम्पोतून दीड कोटींचा प्रतिबंधित पानमसाला, सुगंधित तंबाखू जप्त

पालघर : राज्यात बंदी असलेल्या गुटखा, पानमसाला आणि सुगंधित तंबाखूच्या वाहतुकीविरोधात अन्न व औषध प्रशासनाच्या (एफडीए) पालघर विभागाने शुक्रवारी (९ ऑक्टोबर) मोठी कारवाई केली. मुंबई-अहमदाबाद राष्ट्रीय महामार्गावर मनोरजवळ अडवलेल्या टेम्पोतून १ कोटी ३० लाख ८६ हजार रुपयांचा प्रतिबंधित माल पथकाने ताब्यात घेतला. २० लाखांच्या टेम्पोसह जप्त ऐवजाची एकूण किंमत १ कोटी ५० लाख ८६ हजार रुपये इतकी आहे.

गुप्त माहिती मिळाल्यानंतर विश्वासराव भोये आणि प्र. शि. कच्छवे या अन्न सुरक्षा अधिकाऱ्यांच्या पथकाने, सहायक आयुक्त प्रवीण सूर्यवंशी यांच्या मार्गदर्शनाखाली, वाडे खडकोणा गावाच्या हद्दीत हॉटेल मनोर गेटसमोर सापळा लावला. सायंकाळी साडेचारच्या सुमारास गुजरातकडून आलेला एक संशयास्पद टेम्पो थांबवण्यात आला. मनोर पोलिसांच्या मदतीने तपासणी केली असता त्यात पानमसाला आणि सुगंधित तंबाखूचा मोठा साठा आढळला.

जप्त मालाची मोजणी करून तो मनोर पोलीस ठाण्यात पुन्हा टेम्पोत भरला जात असताना, टेम्पोचा आडोसा घेऊन चालक आणि क्लिनर पळून गेले. दोघेही राजस्थानचे रहिवासी असून पोलीस त्यांचा शोध घेत आहेत.

हा माल वापी (गुजरात) येथून भरण्यात आला होता आणि मध्यस्थांमार्फत लोणावळ्यातील एका व्यक्तीला पुरवला जाणार होता, असे प्राथमिक तपासात समोर आले आहे. अन्न सुरक्षा अधिकारी भोये यांच्या फिर्यादीवरून वाहनमालकासह आठ आरोपींविरुद्ध मनोर पोलीस ठाण्यात गुन्हा दाखल झाला असून पोलीस उपनिरीक्षक बालाजी मुंडे पुढील तपास करत आहेत.

माहिती स्रोत: लोकसत्ता