घरफोडीत गेलेला ३२ लाखांचा ऐवज मूळ मालकाला परत; जळगाव एमआयडीसी पोलिसांची कार्यवाही

जळगाव : घरफोडीत चोरीला गेलेले आणि नंतर पोलिसांनी हस्तगत केलेले सोने-चांदीचे दागिने व रोकड, असा एकूण ३२,१८,८०० रुपयांचा ऐवज एमआयडीसी पोलिसांनी फिर्यादीला परत दिला. न्यायालयाने आदेश दिल्यानंतर आवश्यक कायदेशीर सोपस्कार पूर्ण करून तो सोपवण्यात आला.

एमआयडीसी पोलिस ठाण्याच्या हद्दीतील महाजन नगर, रामेश्वर कॉलनी परिसरातील एका बंद घराचा कडीकोयंडा तोडून चोरट्यांनी दागिने आणि रोकड लांबवली होती. गुन्हे शोध पथकाने तपास करून काही दिवसांतच संशयितांना पकडले आणि चोरीला गेलेला संपूर्ण ऐवज हस्तगत केला.

ऐवज परत मिळावा, यासाठी फिर्यादीने जळगाव न्यायालयात अर्ज केला होता. न्यायालयाने ८ ऑक्टोबर २०२६ रोजी तो परत करण्याचे आदेश दिले. त्यानंतर पोलिस ठाण्यात पंचांसमक्ष अधिकृत पंचनामा करून ऐवज फिर्यादीच्या ताब्यात देण्यात आला.

न्यायालयाचे आदेश मिळताच जप्त मुद्देमाल मूळ मालकांना तातडीने परत करावा, अशा सूचना पोलिस अधीक्षक श्रीकांत धिवरे यांनी जिल्ह्यातील सर्व ठाण्यांना दिल्या होत्या. वरिष्ठ पोलिस निरीक्षक बबन आव्हाड यांच्या नेतृत्वाखाली ही कार्यवाही झाली.

माहिती स्रोत: हिंदुस्थान समाचार